މާލޭގައި ގެއެއްގެ މީހުންނަށް ވަދެނުކުމެވޭ ގޮތަށް ރާނާފައިވާ ފާރެއް މާލޭ ސިޓީ ކައުންސިލުން ތަޅާލުމާ ގުޅިގެން، އެ ފާރު އަލުން ރޭނުމަށް އަންގައި ސިވިލް ކޯޓުން ވަގުތީ އަމުރެއް ނެރެފިއެވެ.
މި މައްސަލަ ކޯޓަށް ހުށަހެޅީ ހ. ހުދުފިނިފެންމާގޭގެ ވެރިޔާ، ހަސަން ޝާކިރު މުހައްމަދެވެ. މިދިޔަ މަހު ސިޓީ ކައުންސިލުން ހުދުފިނިފެންމާގޭ ފާރެއް ތަޅާލީ އިންވެގެން ހުރި ގޭގެ މީހުންނަށް ވަދެނުކުމެ ނޫޅެވޭތީއެވެ. ނަމަވެސް، މި ފާރު ރާނާފައިވަނީ ސިޓީ ކައުންސިލްގެ ހުއްދައާ އެކުގައެވެ.
ޝާކިރު ވަނީ ކައުންސިލުން ފާރު ތަޅާލުމަށް ނިންމީ ގާނޫނާ ޚިލާފަށްކަމަށް ކަނޑައަޅައިދިނުމަށާއި، މައްސަލަ ނިމެންދެން ކުރިން އޮތްގޮތަށް އެތަން ބޭއްވުމަށް އެދިފައެވެ.
ސިވިލް ކޯޓުން ނެރުނު އަމުރުގައި، ޝަރީޢަތުން އެހެން ގޮތަކަށް އަންގަންދެން، ހުދުފިނިފެންމާގޭގެ އިރުމަތީގައިވާ އިމާރާތަށް ކުރިން ވަދެނުކުމެ އުޅުނު ގޮތަށް، އިންވެގެން އޮންނަ ގޯޅިމަގުން ވަދެނުކުމެވޭނެ ގޮތް 48 ގަޑިއިރުގެ ތެރޭގައި ހަމަޖައްސައިދިނުމަށް ސިޓީ ކައުންސިލަށް އަންގާފައިވެއެވެ. އަދި ހުދުފިނިފެންމާގޭ ފާރު ތަޅާލުމުގެ ކުރިން އޮތް ހާލަތަށް އަނބުރާ ގެނައުމަށްފަހު، ކައުންސިލްގެ މުވައްޒަފުން އެތަނުން ނުކުތުމަށްވެސް އަމުރުކޮށްފައިވެއެވެ.
Advertisement
This content is created and paid for by advertisers and does not involve Voice Journalists
