މަސްތުވާތަކެތި ގެންގުޅުނު ކަމަށް ތުހުމަތުކުރެވިގެން ގައްދޫން ހައްޔަރުކުރި ޒުވާނާގެ ބަންދަށް ކޯޓުން 15 ދުވަހަސް ޖަހައިފިއެވެ.
ގދ. ގައްދޫގައި ފުލުހުން ހިންގި އޮޕަރޭޝަނެއްގައި 96 ގްރާމްގެ މަސްތުވާތަކެތި އަތުލައިގަނެ، 38 އަހަރުގެ ފިރިހެނަކު ހައްޔަރުކޮށްފައިވާކަން ފުލުހުންވަނީ ކަށަވަރު ކޮށްދީފައެވެ.
މި މައްސަލައިގައި ގައްދޫ މެޖިސްޓްރޭޓް ކޯޓުން ވަނީ ތުހުމަތުކުރެވޭ މީހާ 15 ދުވަހަށް ބަންދުކުރުމަށް އަމުރުކޮށްފައެވެ.
ފުލުހުން ބުނާ ގޮތުގައި، އިންޓެލިޖެންސް މަޢުލޫމާތަކާ ގުޅިގެން ކޯޓު އަމުރެއްގެ ދަށުން ގައްދޫގެ "ފަހާގެ" އަށް ވަދެ ބަލާ ފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެހި ފެނުނެވެ.
ހައްޔަރުކުރެވުނު މީހާއަކީ ކުރިން މަސްތުވާތަކެތީގެ 8 މައްސަލައެއްގައި 8 ފަހަރު ހައްޔަރުކުރެވިފައިވާ މީހެއްކަމަށް ފުލުހުން މަޢުލޫމާތުދިނެވެ.
ނަމަވެސް، ތުހުމަތުކުރެވޭ މީހާގެ ދިފާޢީ ވަކީލު ބުނީ މުވައްކިލާއި މަސްތުވާތަކެއްޗާ ސީދާ ގުޅުން އޮތްކަން ސާބިތުކޮށްދޭ ފުރިހަމަ ހެކި ފުލުހުން ހުށަހަޅާފައިނުވާ ކަމަށެވެ. އަދި މަސްތުވާތަކެތި ހޯދީ ތުހުމަތުކުރެވޭ މީހާގެ ހާޒިރުގައި ނޫންކަންވެސް ވަކީލު ފާހަގަކުރިއެވެ.
Advertisement
This content is created and paid for by advertisers and does not involve Voice Journalists
