މި ސަރުކާރުގެ އަމާޒަކީ ސިޔާސަތުތައް އެކަށައެޅުމުގައި ނިންމާ ކޮންމެ ނިންމުމަކީ ހެއްކަށް ބިނާކޮށް ނިންމާ ނިންމުމަކަށް ހެދުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.

ރައީސް މިހެން ވިދާޅުވީ “ތެވެލި މަހާސިންތާ 2024” އިފްތިތާޙް ކުރުމަށް މިއަދު ބޭއްވުނު ރަސްމިއްޔާތުގައި ވާހަކަ ދައްކަވަމުންނެވެ.

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އިންތިޒާމުކުރާ މި ކޮންފަރެންސް ބާއްވާތާ މިއީ ހަތްވަނަ އަހަރެވެ. މި ކޮންފަރެންސް ކުރިއަށްދާނީ 19-20 އޯގަސްޓު 2024 ގައެވެ. މި އަހަރުގެ ތީމަކީ "ބްރިޖިންގ ބައުންޑަރީސް: އެކްސްޕްލޯރިންގ ސިނަރޖީސް އެކްރޮސް ރިސަރޗް ޑިސިޕްލިންސް”.

Advertisement

ކޮންފަރެންސްގައި ދެއްކެވި ވާހަކަފުޅުގައި ރައީސް ވިދާޅުވީ، މި ސަރުކާރުން ދެކެން ބޭނުންވަނީ ކޮންމެ ސިޔާސަތެއް ކަނޑައެޅުމުގައި އަދި ކޮންމެ ގޮންޖެހުމަކާ ކުރިމަތިލުމުގައި ހެކިތަކުގެ މައްޗަށް ބިނާކޮށް، ޕްރޮފެޝަނަލް ހައްލުތައް ހޯދާ ދިވެހިރާއްޖެއެއް ކަމަށެވެ.

އެހެންކަމުން، މި މުހިންމު މަސައްކަތުގައި އެކަޑަމިކް ދާއިރާއާއި، ދިރާސާކުރާ ފަރާތްތަކާއި، ސިޔާސަތު އެކުލަވާލާ ފަރާތްތަކާއި، އަމިއްލަ ވިޔަފާރިތަކާއި، އަދި އާންމު ރައްޔިތުން ހިމެނޭ ގޮތަށް ހުރިހާ ފަރާތްތަކުން ގުޅިގެން މަސައްކަތްކުރުމަށް ރައީސް ގޮވާލެއްވިއެވެ.

 “ތެވެލި މަހާސިންތާ 2024” އިފްތިތާޙް ކުރުމަށް މިއަދު ބޭއްވުނު ރަސްމިއްޔާތުގެ ތެރެއިން: ފޮޓޯ/ ރައީސް އޮފީސް

އަމިއްލަ ދިރާސާތަކުގެ މުހިންމުކަން ފާހަގަކުރައްވަމުން، ދިވެހިންގެ ދިރާސާކުރުމުގެ ނިޒާމުތައް ހަރުދަނާކޮށް، ތަރައްޤީގެ ނަމޫނާތައް ދިވެހި މުޖުތަމަޢުތަކާއި، ޢަޤީދާއާއި، މުސްތަޤްބަލަށް ކުރާ ތަޞައްވުރާ އެއްގޮތްވާކަން ޔަޤީންކުރުމަކީ ވަރަށް މުހިންމު ކަމެއްކަމުގައި ރައީސް ވިދާޅުވިއެވެ.

މިއާއެކު ދިރާސާއާއި ތަރައްޤީ ކުރިއެރުވުމަށް މި ސަރުކާރުން ކުރަމުންދާ މަސައްކަތްތަކާއި، ދިރާސާގެ މައްޗަށް ބިނާވެފައިވާ މުސްތަޤްބަލެއްގެ މައިގަނޑު ބިންގަލެއްގެ ގޮތުގައި ނޭޝަނަލް ރިސަރޗް ކައުންސިލެއް އުފެއްދުން ފާހަގަކުރެއްވިއެވެ.

ނިންމާލަމުން ރައީސް ގޮވާލެއްވީ، އެންމެން ވެސް ދިރާސާތަކަށް އަގުދީ އެއަށް އެހީތެރިވެ، ސުވާލުކޮށް، ޢިލްމު ހޯދައި، އަދި ޤައުމު ކުރިއެރުވުމުގައި ޢަމަލީގޮތުން ބައިވެރިވުމަށެވެ. އަބަދުވެސް ބަދަލުވަމުންދާ ދުނިޔެއެއްގައި ދިވެހިރާއްޖޭގެ ދެމެހެއްޓެނިވި ކުރިއެރުމާއި، އައު އީޖާދުތަކާއި، ފާގަތިކަން ޔަޤީންކުރެވޭނެ ކަމުގެ އުންމީދު ރައީސް ފާޅުކުރެއްވިއެވެ.