ނޫމަޑި ރިސޯޓްސް އެންޑް ރެސިޑެންސް އާއި ދިވެހި ސަރުކާރާ ދެމެދު އުފެދިފައިވާ މައްސަލައަކާ ގުޅިގެން ރައީސް ޑރ. މުހައްމަދު މުއިއްޒުއާ ބައްދަލުކުރެއްވި ކަމަށް ބުނެ ދެކެވޭ ވާހަކަތައް މިއަދު ކޮމިޝަނަރ އޮފް ޕޮލިސް އަލީ ޝުޖާއު ދޮގުކުރައްވައިފިއެވެ.

ރޭ ބޭއްވުނު ޕީޕަލްސް ނެޝަނަލް ފްރޮންޓް (ޕީއެންއެފް)ގެ ޖަލްސާއެއްގައި ކުރީގެ ކޮމިޝަނަރ އޮފް ޕޮލިސް ހުސައިން ވަހީދު މި މައްސަލައާ ގުޅިގެން ވިދާޅުވެފައިވަނީ އޭރު ރައީސް މުއިއްޒުއާ ބައްދަލުކުރެއްވި ކަމަށާއި، އެ ބައްދަލުވުމުގައި މިހާރުގެ ކޮމިޝަނަރ އޮފް ޕޮލިސް ޝުޖާއުވެސް ބައިވެރިވެވަޑައިގަތް ކަމަށެވެ. އަދި އޭނާ ވަނީ ރައީސް މުއިއްޒުއާ ގުޅުވައި އިތުރު ތުހުމަތުތަކެއްވެސް ކުރައްވާފައެވެ.

ނަމަވެސް މިއަދު ނެރުއްވި ބަޔާނެއްގައި ކޮމިޝަނަރ އޮފް ޕޮލިސް ޝުޖާއު ވިދާޅުވެފައިވަނީ ނޫމަޑި މައްސަލާގައި ރައީސް މުއިއްޒުއާ ބައްދަލުކުރެއްވުމަށް ހުސައިން ވަހީދުއާއެކު ވަޑައިގެންނެވި ކަމަށް ދެއްކެވި ވާހަކައަކީ ހަގީގަތާ ޚިލާފު ވާހަކައެއް ކަމަށެވެ. އަދި އެ މައްސަލައާ ގުޅޭ ގޮތުން އެއްވެސް މަޝްވަރާއެއް ކުރުމަށް ކުރީގެ ކޮމިޝަނަރ އޮފް ޕޮލިސް ހުސައިން ވަހީދުއާ އެކު އެއްވެސް ފަރާތަކާ ބައްދަލުކުރައްވާފައި ނުވާ ކަމަށްވެސް ވިދާޅުވެފައިވެއެވެ.

Advertisement

ނޫމަޑި ކުންފުންޏާ އަތޮޅުތެރޭގައި ހައުސިންގ ޔުނިޓުތަކެއް އެޅުމަށް ހަވާލުކުރީ ކުރީގެ ރައީސް މުހައްމަދު ނަޝީދުގެ ވެރިކަމުގެ ދުވަސްވަރުއެވެ. ނަމަވެސް އެއްބަސްވުމާ އެއްގޮތަށް މަސައްކަތް ކުރިއަށް ނުދާ ކަމަށް ބުނެ އެއްބަސްވުން ބާތިލުކޮށްފައި ވަނީ ރައީސް އަބްދުﷲ ޔާމީންގެ ވެރިކަމުގައި ރައީސް މުއިއްޒު ހައުސިންގ މިނިސްޓަރަކަށް ހުންނެވި ދުވަސްވަރުއެވެ.

ރައީސް ޔާމީންގެ ވެރިކަމުގައި އެ އެއްބަސްވުން ބާތިލުކުރުމުން ނޫމަޑިއަށް 55 މިލިއަން ޑޮލަރު ބަދަލެއްގެ ގޮތުގައި ސަރުކާރުން ދޭން ޖެހުނެވެ. އަދި އެ މައްސަލަ އާބިޓްރޭޝަނަށް ހުށަހެޅުމުން ދެއްވި ބަޔާނަކާ ގުޅިގެން ރައީސް މުއިއްޒުއާ ދެކޮޅަށް މިދިޔަ ސަރުކާރުން ދައުވާކުރި ނަމަވެސް އެ މައްސަލަ ސާބިތުވެފައެއް ނުވެއެވެ.