ބުޅާ މަސް ކައްކައި ވިއްކާކަމުގެ މައްސަލަ ފުލުހަށް މިއަދު ހުށަހެޅި ކަމަށް އެނިމަލް ވެލްފެއާ މިނިސްޓްރީން ބުނެފިއެވެ.

އެނިމަލް ވެލްފެއާ މިނިސްޓްރީން މިއަދު ހާމަކުރި ގޮތުގައި، ބުޅާ ކަތިލައި އޭގެ މަސް ކައްކައި ވިއްކާކަމުގެ މައްސަލައެއް ފުލުހުންނަށް މިއަދު އެމިނިސްޓްރީގެ ފަރާތުން ވަނީ ހުށަހަޅައިފައެވެ.

މިނިސްޓްރީގެ އިސް އޮފިޝަލެއް ވިދާޅުވި ގޮތުގައި، މި މައްސަލަ އާންމު ފަރާތަކުން މިއަދު ހެނދުނު މިނިސްޓްރީއަށް ހުށަހެޅުމާ ގުޅިގެން، މިނިސްޓްރީން ވަނީ އެކަން ފުލުހުންގެ ސަމާލުކަމަށް ގެނެސްފައެވެ. އަދި އެނިމަލް ވެލްފެއާ މިނިސްޓްރީގެ އިތުރުން ހޯމް މިނިސްޓްރީން ވެސް މި މައްސަލަ ގާތުން ބަލަމުންދާ ކަމަށް އެ އޮފިޝަލް ވިދާޅުވިއެވެ.

މި މައްސަލައިގައި ތުހުމަތުކުރެވެނީ ބަންގްލަދޭޝްގެ ރައްޔިތެއް ކަމަށްވާ އަރަފާތު ހޮސައިންގެ މައްޗަށެވެ. އިމިގްރޭޝަނުން މިއަދު އިއުލާންކޮށްފައިވާ ގޮތުގައި، އަރަފާތު ހޮސައިން ވަނީ ފަސް ދުވަހުގެ ތެރޭގައި އިމިގްރޭޝަނަށް ހާޒިރުވުމަށް އަންގާފައެވެ.

އެސިސްޓެންޓް ކޮމިޝަނަރ އޮފް ޕޮލިސް، އަޙްމަދު ޝިފާން ވިދާޅުވި ގޮތުގައި ފުލުހުން ވެސް މި މައްސަލައިގައި ތުހުމަތުކުރެވޭ ބިދޭސީ މީހާ ހޯދުމުގެ މަސައްކަތް ކުރަމުންދެއެވެ.

މި މައްސަލައާ ގުޅޭ އެއްވެސް މަޢުލޫމާތެއް އާންމުންނަށް ލިބިފައިވާނަމަ، އިމިގްރޭޝަނުގެ ނަންބަރު 9199017 އަށް ގުޅުމަށް ނުވަތަ [email protected] އަށް މެއިލް ކުރުމަށް އެ އިދާރާއިން އެދިފައިވެއެވެ.