މަކުނުވިދުރި ބަލި ފެތުރޭ ޤައުމުތަކުން އަންނަ ފަސިންޖަރުން ސްކްރީން ކުރުމަށް އެޗްޕީއޭ ތައްޔާރުވަމުންދާކަމަށް އެ އެޖެންސީން ބުނެފިއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފައިވާ ގޮތުގައި، މަކުނުވިދުރި ފެތުރޭ ޤައުމުތަކުން އަންނަ ފަސިންޖަރުން އެއަރޕޯޓުގައި ސްކްރީން ކުރުމުގެ ތައްޔާރީތައް މިހާރުދަނީ ވަމުންނެވެ.

އެޗްޕީއޭގެ ފަރާތުން މިމައުލޫމާތުތައް ހާމާކޮށްފައިވަނީ ދުނިޔޭގެ އެކި ގައުމުތަކުގައި މިހާރު ފެތުރެމުން އަންނަ މަކުނުވިދުރިއާ ގުޅޭ ގޮތުން ދައުލަތުގެ މީޑިއާ ޕީއެސްއެމްގެ 'ރާއްޖެ މިއަދު' ޕްރޮގްރާމުގައި މިރޭ ވާހަކަ ދައްކަވަމުންނެވެ.

އެޗްޕީއޭގެ ޕަބްލިކް ހެލްތު ޑިރެކްޓަރު ސަނާ ސަލީމް ވިދާޅުވި ގޮތުގައި، ދަތުރުފަތުރުގެ ޒަރީޢާއިން މި ބަލި ފެތުރުމުގެ ފުރުސަތު ބޮޑުވެފައިވާތީ، މަކުނުވިދުރި ފެތުރޭ ޤައުމަކަށް ދަތުރުކޮށްފައިވޭތޯ ބެލުމަށް އިމިގްރޭޝަން ފޯމުގައި ސުވާލު ހިމެނުމަށް ދަނީ މަސައްކަތް ކުރަމުންނެވެ.

މި ބަލި ފެތުރޭ ޤައުމަކުން ނުވަތަ ބައްޔަށް ޕޮޒިޓިވް ވެފައިވާ މީހަކު ރާއްޖެއަށް އެތެރެވާ ހާލަތެއްގައި އެއަރޕޯޓުގައި ސްކްރީނިންގ ހެދޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުންދާ ކަމަށް ވެސް ސަނާ ފާހަގަކުރެއްވިއެވެ.

ހެލްތު މިނިސްޓްރީގެ ޑިރެކްޓަރ ޖެނެރަލް އޮފް ހެލްތު ޑރ. އަޙްމަދު އަޝްރަފް ވިދާޅުވި ގޮތުގައި، މި ބަލީގެ ކޭހެއް ފެނިއްޖެނަމަ އެކަން ބެލުމަށް ނިޒާމެއް ތައްޔާރުކުރަމުންދާއިރު، ހެލްތު އެމަޖެންސީ ކޮމިޓީއާއި ޓެކްނިކަލް އެޑްވައިޒަރީ ގްރޫޕް ވެސް މިހާރުވަނީ އެކުލަވާލެވިފައެވެ. އަދި ހޮސްޕިޓަލްތަކުގައި ވެސް މިފަދަ ކޭސްތައް އައިސޮލޭޓް ކުރެވޭނެ އިންތިޒާމު ހަމަޖައްސާފައިވާ ކަމަށް ޑރ. އަޝްރަފް ވިދާޅުވިއެވެ.

އެޗްޕީއޭއިން އިތުރަށް ބުނެފައިވާ ގޮތުގައި، މި ބައްޔަށް ޚާއްޞަ ފަރުވާއެއް ހޯދިފައި ނެތް ނަމަވެސް، ބަލި ޖެހިފައިވާ މީހާގެ ކިބައިން ފެންނަ އަލާމާތްތަކަށް ފަރުވާ ފޯރުކޮށްދެވޭނެ ކަމަށެވެ. އަދި ބަލި ފެތުރުން ކޮންޓްރޯލް ކުރުމާއި، ބައްޔަށް ޓެސްޓުކުރުމާއި، އެކަމާ ގުޅިގެން ވާންޖެހޭ ތައްޔާރީތައް ވަމުންދާ ކަމަށް ވެސް އެޗްޕީއޭއިން ބުނެފައިވެއެވެ.