މެލޭޝިއާގެ އޭރުގެ ބޮޑުވަޒީރު މަހާތީރު މުހައްމަދު، 2019 ވަނަ އަހަރު ކަޝްމީރުގެ މައްސަލައިގައި އިންޑިއާއާ ގުޅޭ ގޮތުން ދެއްކެވި ވާހަކަތަކާއެކު ގޯސްވެފައިވާ ދެގައުމުގެ ގުޅުން އަލުން ބަދަހިކުރުމާ ބެހޭ ގޮތުން ދެގައުމުގެ ވެރިންގެ މެދުގައި މިއަދު މަޝްވަރާކުރައްވައިފިއެވެ.

މިއަދު އިންޑިއާގެ ވެރިރަށް ދިއްލީގައި ހުންނަ އިންޑިއާގެ ރިޔާސީ ގަނޑުވަރު ރަޝްތްރަޕަތީ ބަވަންގައި މެލޭޝިއާގެ ބޮޑުވަޒީރު އަންވަރު އިބްރާހިމްއާއި އިންޑިއާގެ ބޮޑުވަޒީރު ނަރެންދްރަ މޯދީ ވަނީ ބައްދަލުކުރައްވައި މަޝްވަރާކުރައްވާފައެވެ. އަދި ޓެކްނޮލޮޖީގެ ދާއިރާއިން ދެގައުމުގެ ގުޅުން ބަދަހިކޮށް، ދެގައުމުގެ ގުޅުން 'ކޮމްޕްރިހެންސިވް ސްޓްރެޓީޖިކް ޕާޓްނަޝިޕް' އެއްގެ ދަރަޖައަށް ގެންދަވާނެކަމަށް މޯދީ ވިދާޅުވިއެވެ. އަދި މިދިޔަ އަހަރު އެކަނިވެސް މެލޭޝިއާއިން އިންޑިއާގައި 5 ބިލިއަން އެމެރިކާ ޑޮލަރު އިންވެސްޓްކުރިކަން މޯދީ ފާހަގަކުރެއްވިއެވެ. އަދި ހަމައެއާއެކު ދެގައުމުގެ މެދުގައި ކުރެވޭ ވިޔަފާރީގައި އިންޑިއަން ރުޕީޒް އާއި މެލޭޝިއަން ރިންގިޓް ބޭނުންކުރެވެމުންދާކަންވެސް މޯދީ ފާހަގަކުރެއްވިއެވެ.

ދެގައުމުގެ ގުޅުން ގޯސްވުމާ ގުޅިގެން މެލޭޝިއާއިން ޕާމް އޮއިލް ގަންނަ މިންވަރު އިންޑިއާއިން ވަރަށް ބޮޑުތަނުން މަދުކޮށްލިނަމަވެސް، އަލުން އެކަމުގައި އަމަލުކުރައްވާނެ ގޮތެއް މޯދީ ވިދާޅެއް ނުވެއެވެ. ޕާމް އޮއިލް އަކީ މެލޭޝިއާގެ އެންމެ މުހިއްމު އެއް އެކްސްޕޯޓެވެ.

މެލޭޝިއާގެ ބޮޑުވަޒީރަކު 2018ގެ ފަހުން އިންޑިއާއަށް ކުރައްވާ ފުރަތަމަ ދަތުރުފުޅުގައި، ބްރިކްސް ޖަމްއިއްޔާއަށް ވަނުމަށް މެލޭޝިއާއިން ހުށަހައަޅާފައިވާ ހުށަހެޅުމަށް އިންޑިއާގެ ތާއީދު ހޯއްދެވުމަށް އަންވަރު މަސައްކަތްކުރައްވާނެއެވެ.