ޕްރޮސިކިއުޓާ ޖެނަރަލްގެ މަޤާމުން ހުސެއިން ޝަމީމް ވަކިކުރުމަށް މަޖިލީހުން ފާސްކޮށްފިއެވެ.

މަޖިލީހުން ޝަމީމް ވަކިކުރުމަށް ނިންމާފައިވާއިރު، އޭނާ އިސްތިއުފާ ދިންކަން މީޑިއާތަކަށްވަނީ ކަށަވަރުވެފައެވެ. އެހެންނަމަވެސް، މަޖިލީހުގެ ނައިބު ރައީސް އަހުމަދު ނާޒިމް ވިދާޅުވިގޮތުގައި، މަޖިލީހުގެ ވޯޓު ނެގުމާ ހަމައަށްވެސް އެ ސިޓީ ރައީސް އޮފީހަށް އަދި މަޖިލީހަށްވެސް ލިބިފައެއް ނުވެއެވެ.

މީޑިއާތަކަށް މައުލޫމާތު ލިބިފައިވާ ގޮތުގައި މަޖިލިސްގެ ޖަލްސާ ފެށުމުގެ ކުރިން، ޝަމީމްވަނީ އިސްތިއުފާ ދެއްވުމަށްފަހު އޮފީހުން ނުކުމެވަޑައިގެންފައެވެ.

އިސްތިއުފާގެ ސިޓީ މީޑިއާތަކަށް ލިބިފައިވާއިރު، އެސިޓީގައި ޝަމީމް ފާހަގަކުރެއްވިގޮތުގައި އޭނާއާ ދެކޮޅަށް ކުރެވޭ ތުހުމަތުތައް ހާމަކޮށް، އޭނާގެ ޖަވާބު ސިއްރުކުރުމަކީ އަދުލު އިންސާފާއި ޤުދުރަތީ އިންސާފުގެ އުސޫލުތަކާ ޚިލާފު ކަމެކެވެ. މި ކަމާމެދު ކަންބޮޑުވުން ފާޅުކުރުމުގެ ގޮތުން، ޤާނޫނުއަސާސީގެ 226 ވަނަ މާއްދާގެ ދަށުން އޭނާ އިސްތިއުފާ ދެއްވިކަމަށް އެ ސިޓީގައި ވިދާޅުވިއެވެ.

ޝަމީމު ޕީޖީގެ މަޤާމުން ވަކިކުރުމަށް މަޖިލިހަށް ހުށަހެޅުއްވި އިތުބާރު ނެތްކަމުގެ މައްސަލައިގައި މިއަދު ޖުޑިޝަރީ ކޮމިޓީއަށް ޝަމީމް ހާޒިރުކުރެވުނެވެ. ޝަމީމް އެދިވަޑައިގަތީ ބައްދަލުވުން ހާމަކޮށް ބޭއްވުމަށެވެ. ނަމަވެސް، އޭނާއަށް ޖަވާބުދާރީވުމުގެ ފުރުސަތު ދެވުނީ ސިއްރު ބައްދަލުވުމެއްގައެވެ.

މި ބައްދަލުވުމަށްފަހު، ޖުޑިޝަރީ ކޮމިޓީން ނިންމީ ޝަމީމް ވަކިކުރުމަށް ހުށަހެޅުމަށެވެ. އަދި މައްސަލަ މަޖިލީހުގެ ތަޅުމަށް ފޮނުވުނެވެ.

ޝަމީމް ދެކޭގޮތުގައި، އޭނާއާ ދެކޮޅަށް ކުރެވޭ ތުހުމަތުތަކަކީ ހަޤީޤަތާ ޚިލާފު، ކުރިން ޖަވާބުދީފައިވާ މައްސަލަތަކެކެވެ. އޭނާ ވިދާޅުވީ، މެންބަރުން ޕީޖީ އޮފީހުގެ ކުރީގެ ރިޕޯޓުތަކާއި ލިޔުންތައް ބައްލަވާލެއްވިނަމަ، މިފަދަ ތުހުމަތުތަކެއް ކުރައްވާކަށް ނުޖެހޭނެ ކަމަށެވެ.

ޝަމީމް އިތުރަށް ވިދާޅުވީ، މި ތުހުމަތުތަކަކީ އޭނާ މަޤާމުން ވަކިކުރުމަށް ކުރެވޭ ހަޤީޤަތާ ޚިލާފު ތުހުމަތުތަކެއް ކަމަށެވެ. އޭނާ މި ތުހުމަތުތަކަށް ކުރިން ޖަވާބުދާރީވެފައިވާ ކަމަށްވެސް ފާހަގަކުރެއްވިއެވެ.

މަޖިލީހުން މިރޭ ޝަމީމް ޕީޖީގެ މަޤާމުން ވަކިކުރުމަށް ނެގި ވޯޓްގައި ޝަމީމް ވަކިކުރަން 65 މެމްބަރުން ވޯޓްދެއްވާފައިވާއިރު، ވަކިކުރަން ނުފެންނަކަމަށް 9 މެމްބަރަކު ވަނީ ވޯޓްދެއްވާފައެވެ. އަދި ވަކިކޮޅަކަށް ވޯޓް ނުދެއްވާވެސް އެއް މެމްބަރަކު އިންނެވިއެވެ.