ސަރުކާރުގެ ތަރައްޤީގެ އެޖެންޑާގައި ހިމެނޭ އިތުރު މަޝްރޫއުތަކަށް ސައުދީ ފަންޑް ފޮ ޑިވެލޮޕްމަންޓް (އެސްޑީއެފް)ގެ އެހީތެރިކަން ހޯދުމަށް ފޮރިން މިނިސްޓަރު މޫސާ ޒަމީރު މަސައްކަތް ފައްޓަވައި, ސައުދީ ފަންޑުގެ ސީއީއޯ ސުލްތާން އަބްދުއްރަހްމާން އަލް މަރުޝަދު އާ މަޝްވަރާ ކުރައްވައިފިއެވެ.

ސައުދީ އަރަބިއާއަށް ކުރައްވަމުންދާ ދަތުރުފުޅެއްގައި މިނިސްޓަރު ޒަމީރު މިއަދު ސައުދީ ފަންޑުގެ ސީއީއޯ ސުލްތާން އަބްދުއްރަހްމާން އަލް މަރުޝަދާ ބައްދަލުކުރައްވައި މަޝްވަރާކުރެއްވިއެވެ. މި ބައްދަލުވުމުގައި ރާއްޖެއަށް އެ ފަންޑުން ދެމުންދާ އެހީތެރިކަމަށް ޝުކުރު އަދާކުރެއްވިކަމަށް ފޮރިން މިނިސްޓްރީން ބުނެފައިވެއެވެ.

އަދި ރައީސް ޑރ. މުހައްމަދު މުއިއްޒުގެ ތަރައްޤީގެ އެޖެންޑާގައި ހިމެނޭ އުމްރާނީ ތަރައްޤީއާއި ޞިއްޙީ ޚިދުމަތް ތަރައްޤީކުރުމަށް އެ ފަންޑުގެ އެހީތެރިކަން އިތުރު ދާއިރާތަކަށް ފުޅާކުރުމާ ގުޅޭގޮތުން ދެ ބޭފުޅުން މަޝްވަރާކުރެއްވިކަމަށްވެސް މިނިސްޓްރީން ހާމަކޮށްފައިވެއެވެ.

ސައުދީ ފަންޑުން މިހާތަނަށް ރާއްޖޭގެ 16 މަޝްރޫއަކަށް 470 މިލިއަން ޑޮލަރު (7.2 ބިލިއަން ރުފިޔާ)ގެ އެހީ ފޯރުކޮށްދީފައިވާއިރު، އޭގެ ތެރޭގައި ފެނާއި ނަރުދަމާ އަދި އުމްރާނީ ތަރައްޤީގެ ބޮޑެތި މަޝްރޫއުތައް ހިމެނެއެވެ. އަދި ވެލާނާ އިންޓަނޭޝަނަލް އެއަރޕޯޓު ތަރައްޤީކުރުމުގެ މަޝްރޫއަށްވެސް އެ ފަންޑުން ވަނީ ލޯނު އެހީ ދީފައެވެ.

މިދިޔަ މެއި މަހު މަރުޝަދު ރާއްޖެއަށް ކުރެއްވި ދަތުރުފުޅެއްގައި އެއަރޕޯޓު މަޝްރޫއު އަވަސްކުރުމަށް އިތުރު 100 މިލިއަން ޑޮލަރުގެ އެހީ ހަމަޖައްސައިދިނުމުގެ އެއްބަސްވުމުގައި ސޮއިކުރެވުނެވެ.