ޣައްޒާގެ މިސްކިތެއްގައި ހައްދުފަހަނަ އަޅާފައިވާ އިސްރާއީލު ސިފައިން ޤުރުއާނުގެ ކޮޕީތައް އަންދާލުމުން އެކަން ކުށްވެރިކޮށް ނުރުހުން ފާޅުކުރުމަށް އަރަބި އަދި މުސްލިމް ޤައުމުތަކަށާއި ޖަމިއްޔާތަކަށް ހަމާސް އިން ގޮވާލައިފިއެވެ.

އަލްޖަޒީރާއިން އިސްރާއީލު ސިފައިންގެ ކެމެރާތަކުން ހޯދާފައިވާ ފުޓޭޖްތައް ގެނެސްދީފައިވާއިރު، މުސްލިމުންގެ މާތް ފޮތުގެ ސަފުހާތައް ވީދާލާ ރޯކުރާމަންޒަރާއި، ޣައްޒާގެ އުތުރުގައި ހުންނަ ބަނީ ސާލިހް މިސްކިތުގައި އަލިފާން ރޯކުރާ މަންޒަރު ވެސް ވަނީ ދައްކާފައެވެ.

ހަމާސްއިން ބުނެފައިވަނީ މިކަމުންވެސް އިސްރާއީލުގެ ނިރުބަވެރިން ފަލަސްޡީނުގެ ބިމަށް ނަފުރަތުކުރާވަރު އެންގޭކަމަށެވެ.

ޚާން ޔުނިސްގެ ތާރީހީ މިސްކިތަށް ބޮން ގޮއްވާލި މަންޒަރު ދައްކުވައިދޭ އިޒްރޭލުގެ ޑްރޯނެއްގެ ވީޑިއޯއެއް ވެސް އެ ޗެނަލުން ވަނީ އާންމުކޮށްފަ އެވެ.

ޣައްޒާ މީޑިއާ އޮފީހުން ބުނީ ފާއިތުވި 10 މަސް ދުވަހުގެ ތެރޭގައި އިސްރާއީލުން ވަނީ ޣައްޒާގެ 610 މިސްކިތާއި ތިން ފައްޅި މުޅިން ހަލާކުކޮށްލާފައެވެ.

ހޮނިހިރު ދުވަހު ހަމާސް ޖަމާއަތުން ވަނީ ފަލަސްތީނުގެ މުސްލިމުންނާއި ކްރިސްޓިއަނުންގެ މާތް ތަންތަން ދިފާއުކޮށް ޣައްޒާއާ ދެކޮޅަށް ކުރަމުންދާ ހަނގުރާމް ނިމުމަކަށް ގެނައުމަށް "ދުނިޔޭގެ މިނިވަން ރައްޔިތުންނަށް" ގޮވާލާފައެވެ.

އިސްރާއީލުގެ ޙަމަލާތަކުގެ ސަބަބުން ފަލަސްޠީނުގެ 40،200 އަށްވުރެ ގިނަ މީހުން ވަނީ ޝަހީދުކޮށްލާފައެވެ.