އަލްއަޤްޞާ މިސްކިތުގައި ޔަހޫދީންގެ ފައްޅިއެއް އެޅުމަށް އިސްރާއީލުގެ ވަޒީރަކު ގޮވާލުމާ ގުޅިގެން ދިވެހި ސަރުކާރުން ހަރުކަށި އިބާރާތުން އެކަން ކުށްވެރިކުރައްވައިފިއެވެ.
ފޮރިން މިނިސްޓްރީން ނެރުއްވި ބަޔާނެއްގައި ވިދާޅުވެފައިވަނީ އަލްއަޤްޞާ މިސްކިތަކީ 1.8 ބިލިއަނަށްވުރެ ގިނަ މުސްލިމުންނަށް ރޫޙާނީ އަދި ތާރީޚީ ގޮތުން މުހިންމު، އިސްލާމީ ތަރިކައިގެ ރަމްޒެއް ކަމަށެވެ.
މި ބަޔާނުގައި އިސްރާއީލު ސަރުކާރަށް ގޮވާލާފައިވަނީ އަލްއަޤްޞާ މިސްކިތުގެ ތާރީޚީ އަދި ޤާނޫނީ ހައިސިއްޔަތަށް ބައިނަލްއަޤްވާމީ ޤާނޫނުތަކާއި އދ.ގެ ކަމާބެހޭ ޤަރާރުތަކާ އެއްގޮތްވާ ގޮތުގެ މަތިން އިޙްތިރާމް ކުރުމަށެވެ. އަދި މިފަދަ ހަރުކަށި ވާހަކަތަކުގެ ސަބަބުން ޣައްޒާގައި ހަނގުރާމަ ހުއްޓާލުމަށް ކުރަމުންދާ މަސައްކަތަށް ހުރަސްއެޅި، މެދުއިރުމަތީގައި އިތުރު ހަމަނުޖެހުންތަކެއް އުފެދިދާނެކަމުގެ ކަންބޮޑުވުން އެބަޔާނުގައި ދިވެހި ފޮރިން މިނިސްޓްރީން ފާޅުކޮށްފައިވެއެވެ.
ދިވެހި ސަރުކާރުން އިތުރަށް ގޮވާލާފައިވަނީ ގުދުސްގެ ގާނޫނީ ހައިސިއްޔަތު ބަދަލުކުރުމަށް އަޅާ ފިޔަވަޅުތައް ހުއްޓުވައި، ފަލަސްތީނުގެ ރައްޔިތުންގެ ހައްގުތައް ހިމާޔަތް ކުރުމަށް ބައިނަލްއަގްވާމީ މުޖުތަމައުއިން މަސައްކަތްކުރުމަށެވެ. އަދި ފަލަސްޠީނުގެ މިނިވަން ދައުލަތެއް ޤާއިމްކުރުމަށް ކުރާ މަސައްކަތުގައި ދިވެހިރާއްޖެ ދެމިއޮންނާނެކަން ވެސް އެ ބަޔާނުގައި ފާހަގަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
