ރާއްޖޭގައި ހުރި ބައެއް އެމްބަސީތައް ކައިރިއަށް ގޮސް އިޒްރޭލާ ދެކޮޅަށް އަޑު އުފުލަމުންދިޔަ ދެ އަންހެނަކު މިއަދު ހައްޔަރުކުރީ އެމްބަސީތަކާއި ސަފީރުންނަށް އުނދަގޫކޮށް ފުލުހުންގެ ވާޖިބަށް ހުރަސްއެޅުމުންކަމަށް ފުލުހުން މިރޭ ބުނެފިއެވެ.
ފުލުހުން މިއަދު ހައްޔަރުކޮށްފައިވަނީ ޑރ. މުޙައްމަދު އިޔާޒުގެ އަނބިކަނބަލުން ޢާއިޝަތު ޝާދިޔާ (47) އާއި ޑރ. ޝަޒްރާ އިބްރާހީމް (36) އެވެ.
މި ދެ އަންހެނުން ހައްޔަރުކުރެވުނު އެއް ސަބަބަކީ ޑިޕްލޮމެޓިކް މިޝަންތަކުގެ ކައިރީގައި ތަކުރާރުކޮށް އެއްވުމެވެ. މީގެ އިތުރުން އަޑުގަދަކުރާ ބޭނުންކޮށްގެން ހަޅޭއްލެވުމާއި ބޭއަދަބީ ބަހުރުވައިން މުޢާމަލާތްކުރުން ހިމެނެއެވެ.
ވަކި ސަފީރަކަށް އުނދަގޫކުރުމުގެ އަމަލުތަކެއް ހިންގިކަމަށްވެސް ފުލުހުން ތުހުމަތުކުރެއެވެ. އަދި ފުލުހުންގެ އިރުޝާދުތަކަށް ތަބާނުވުމަކީވެސް ހައްޔަރުކުރުމަށް މެދުވެރިވި އެއް ސަބަބު ކަމުގައި ފުލުހުން ބުނެއެވެ.
ފުލުހުން ބުނާ ގޮތުގައި، މި އަމަލުތަކަކީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނާ ޚިލާފު ކަންތައްތަކެކެވެ. އަދި މީގެ ކުރިންވެސް މި ދެ އަންހެނުންނަށް ވަނީ މިފަދަ އަމަލުތައް ނުކުރުމަށް ނަސޭހަތްތެރިވެފައެވެ.
Advertisement
This content is created and paid for by advertisers and does not involve Voice Journalists
