އދ.ގެ ސުލުޙަ ބަލަހައްޓާ ލަޝްކަރު ލުބުނާންގައި ތިބޭ މުއްދަތު އިތުރުކޮށްފިއެވެ.

ބުދަ ދުވަހު ބޭއްވުނު ޔޫއެން ސެކިއުރިޓީ ކައުންސިލުގެ ބައްދަލުވުމެއްގައި، ލުބުނާންގައި ހަރަކާތްތެރިވާ އިންޓަރިމް ފޯސް (ޔޫނިފިލް) ގެ މުއްދަތު އަހަރު ދުވަހަށް އިތުރުކުރުމަށް ވަނީ ފާސްކޮށްފައެވެ. ފްރާންސްއިން ހުށަހެޅި މި ޤަރާރުގައިވާ ގޮތުން، ޔޫނިފިލްގެ މުއްދަތު 2025 ވަނަ އަހަރުގެ އޯގަސްޓް 31 ވަނަ ދުވަހާ ހަމައަށް އިތުރުކުރެވިފައިވެއެވެ.

ކައުންސިލުގެ 15 މެންބަރުންގެ އިއްތިފާޤުން މި ޤަރާރު ފާސްކުރެވުނެވެ. ވޯޓުލުމުގެ ކުރިން ވާހަކަދައްކަމުން، ޔޫއެންއަށް ކަނޑައަޅާފައިވާ ފްރާންސްގެ ޑެޕިއުޓީ ޕަރމަނަންޓް ރެޕްރެޒެންޓޭޓިވް ނަތަލީ ބްރޯޑްހަރސްޓް ވިދާޅުވީ، ބްލޫ ހެލްމެޓުން މިހާރު ވަރަށް ނުރައްކާތެރި ހާލަތެއްގައި ތިބި ނަމަވެސް، އެ ފަރާތްތަކުން ކުރަމުންދަނީ ފާހަގަކޮށްލެވޭފަދަ މަސައްކަތްތަކެއް ކަމަށެވެ.

މީގެ އިތުރުން، މި ޤަރާރުގައި ހަނގުރާމަވެރި ޙަރަކާތްތައް ހުއްޓާލުމަށާއި، ހުރިހާ ފަރާތްތަކުންވެސް ވަގުތުން ކަންކަން މަޑުޖައްސާލުމަށް މަސައްކަތްކުރުމަށް ގޮވާލާފައިވާ ކަމަށް ބްރޯޑްހަރސްޓް ވިދާޅުވިއެވެ.

ޣައްޒާގައި އިޒްރޭލުން ހިންގަމުންދާ ޢުދުވާނީ ހަމަލާތަކާ ގުޅިގެން، ލުބުނާން އާއި އިޒްރޭލާ ދެމެދުގައިވާ ސަރަހައްދުގައި ޙިޒްބުﷲއާއި އިޒްރޭލުގެ ސިފައިންނާ ދެމެދު ހަމަލާތައް ބަދަލުކުރެވެމުންދާތީ، އެ ސަރަހައްދުގައި ހަލަބޮލިކަން އިތުރުވެފައިވެއެވެ.

އޮކްޓޯބަރު މަހުން ފެށިގެން މިހާތަނަށް ޣައްޒާގައި 40،500 އަށް ވުރެ ގިނަ މީހުން ވަނީ ޝަހީދުވެފައެވެ.