މާލޭގައި މިރޭ ހިނގި ނުރައްކާތެރި ހާދިސާއެއްގައި އަންހެނަކު ރަހީނުކޮށް، އޭނާގެ ފުރާނައަށް ނުރައްކާވާ ހިސާބަށް ދިޔުމުން ފުލުހުން ވަނީ ބާރުގެ ބޭނުންކޮށްގެން އެ އަންހެން މީހާ ސަލާމަތްކޮށްފައެވެ.
މިހާދިސާގެ މައުލޫމާތު ދެއްވަމުން ފުލުހުން ވިދާޅުވީ ބާރުގެ ބޭނުންކުރަންޖެހުނީ، އަންހެންމީހާގެ ފުރާނަ ސަލާމަތްކުރުމަށްކަމުގައެވެ.
މާފަންނު ސަރަހައްދުގެ ގެއެއްގައި ފެށުނު މި ހާދިސާގައި އަންހެން މީހާގެ ކަރުގައި ވަޅި ޖައްސައި، ފުލުހުންނަށް އިންޒާރުދެމުން ގެންދިޔަ ފިރިހެނާ ވަނީ އަންހެން މީހާ ގޮވައިގެން ސައިކަލެއްގައި ފިލަން މަސައްކަތްކޮށްފައެވެ.
ސޯޝަލް މީޑިއާގައި ފެތުރުނު ވީޑިއޯ ފުޓޭޖްތަކުން ދައްކާގޮތުގައި، މަގުމަތީގައި ސައިކަލު ހުއްޓުވާލުމަށްފަހު، ފުލުހުން ވަނީ ފިރިހެނާގެ ބޮލުގައި މުގުރުން ޖަހައި، އޭނާ ބިންމައްޗަށް ވައްޓާލައި، އަންހެން މީހާ ސަލާމަތްކޮށްފައެވެ.
މި ހާދިސާގައި ފިރިހެނާއަށް އަނިޔާވެ، މިވަގުތު އޭޑީކޭ ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ބުނެފައިވެއެވެ. އަދި އަންހެން މީހާއަށް ވެސް ކުދިކުދި އަނިޔާތަކެއް ވެފައިވާ ކަމަށާއި، އައިޖީއެމްއެޗްގައި އޭނާއަށް ފަރުވާ ދެމުންދާ ކަމަށް ފުލުހުން މަޢުލޫމާތު ދީފައިވެއެވެ.
ފުލުހުން އިތުރަށް ބުނެފައިވަނީ އަންހެން މީހާގެ ހާލު މިހާރު ރަނގަޅު ކަމަށާއި، އޭނާ ސަލާމަތްކުރުމުގެ މަސައްކަތުގެ ތެރޭގައި އޭނާގެ ކަރުގައި ވަޅި އެޅިފައި ނުވާ ކަމަށެވެ. އަދި ފިރިހެނާއަށް ލިބިފައިވާ އަނިޔާތައް ދެނެގަތުމަށް އިތުރު ޓެސްޓުތަކެއް ހެދުމަށް ހަމަޖެހިފައިވާ ކަމަށް ވެސް ފުލުހުން ބުނެފައިވެއެވެ.
މި ހާދިސާއާ ގުޅިގެން ފުލުހުން ދަނީ އިތުރު ތަހުގީގުތައް ކުރިއަށް ގެންދަމުންނެވެ.
Advertisement
This content is created and paid for by advertisers and does not involve Voice Journalists
