މާލޭގައި މިރޭ އަންހެނަކު ރަހީނުކުރި މީހާއަކީ މިދިޔަ ސަރުކާރުގައި ރައީސުލްޖުމްހޫރިއްޔާގެ އަފްއާމްގެ ދަށުން މިނިވަންވި މީހެއްކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.

ފުލުހުން މިރޭ ވަނީ އަންހެނަކު ކަރުގައި ވަޅި ޖައްސަލައިގެން ރަހީނުކޮށްގެން އުޅުނު ފިރިހެނަކު ހައްޔަރުކޮށްފައެވެ. މިރޭ އިރާކޮޅު މި ހާދިސާ ހިނގާފައިވަނީ މާފަންނު އޭއެމްޑީސީ ކައިރީގައެވެ. 

މިކަމާ ގުޅޭގޮތުން ފުލުހުން ބުނީ، މި ހާދިސާގައި ފުލުހުން ހައްޔަރުކޮށްފައިވަނީ ށ.މިލަންދޫއަށް ނިސްބަތްވާ އެރަށު ހެޕީލޭންޑް، އާދަމް އަހުތަރު ކަމަށެވެ. އަހުތަރަކީ ޝަރުތާއި އެކު އަދަބަށް ލުއިދިނުމާއި ގުޅިގެން ދޫކުރުމަށް - ރައީސުލްޖުމްހޫރިއްޔާގެ އޮފީހުގެ ނަންބަރު LA-CL/2022/39 އެންގުމުން، ޤާނޫނު ނަންބަރު 2/2010 (މަޢާފުދިނުމާއި އަދަބު ލުއިކޮށްދިނުމުގެ ޤާނޫނު)ގެ 29 ވަނަ މާއްދާގެ (ނ) އިން ލިބިދޭ އިޙްތިޔާރުގެ ދަށުން، ރައީސުލްޖުމްހޫރިއްޔާ އަފްއާމް ދީފައިވާ މީހެކެވެ.

މި ހާދިސާގައި ފުލުހުން އަހުތަރު ހައްޔަރުކޮށްފައިވަނީ، އަންހެންމީހާ ކަރުގައި ވަޅިޖައްސައިގެން ހުރެ ސައިކަލްގައި ދާންއުޅުމުގެ ތެރޭގައެވެ. އޭރު ސައިކަލް ދުއްވަން އިނީ އަންހެންމީހާއެވެ. އަހުތަރު އިނީ ސައިކަލް ފަހަތުގައި އަންހެންމީހާގެ ކަރުގައި ވަޅި ޖައްސައިގެންނެވެ. ފުލުހުން އަހުތަރު ހައްޔަރުކޮށްފައިވަނީ ސައިކަލްގައި ދާން އުޅުމުގެ ތެރޭގައި އޭނާގެ ގައިގައި މުގުރުބުރިން ޖަހައިގެންނެވެ. މިކަމާ ގުޅޭގޮތުން ފުލުހުން ބުނީ ބާރުގެ ބޭނުންކުރަން ޖެހުނީ އަންހެންމީހާގެ ފުރާނަ ސަލާމަތް ކުރުމަށް ކަމަށެވެ.

ސައިކަލަށް އެރުމުގެ ކުރިންވެސް އަހުތަރު ވަނީ އެކި ފަހަރުމަތިން ގޭތެރޭގައިވެސް އެ އަންހެންމީހާ ރަހީނުކޮށްފައި ބަހައްޓައިގެން އަނިޔާކޮށްފައި ކަމަށް ފުލުހުން ވަނީ ބުނެފައެވެ.

ފުލުހުން އެ އަންހެންމީހާ ސަލާމަތްކުރުމަށް މަސައްކަތްކުރުމުގެ ތެރޭގައި ދެމީހުންނަށް އަނިޔާވިއިރު، އެ ދެމީހުންވެސް ވަނީ ހޮސްޕިޓަލަށް ގެންގޮސް ފަރުވާދީފައެވެ. ވީޑިއޯތަކުން ފެންނަ ގޮތުގައި ފުލުހުންގެ ވެހިކަލްގައި އެ ފިރިހެންމީހާ ހޮސްޕިޓަލަށް ގެންދިޔައިރު އޭނާގެ ހަރަކާތެއް ނެތެވެ. ފިރިހެންމީހާއަށް ފަރުވާދީފައިވަނީ އޭޑީކޭ ހޮސްޕިޓަލުންނެވެ.

މި ހާދިސާގައި އަންހެންމީހާއަށް ކޮންމެވެސް ވަރަކަށް އަނިޔާވިއިރު، އައިޖީއެމްއެޗަށް ގެންގޮސް އޭނާއަށް ފަރުވާދީފައިވާކަމަށް ފުލުހުން ބުނެއެވެ. ނަމަވެސް އޭނާގެ ކަރުގައި ވަޅިއެޅިފަ ނުވާކަމަށް މައުލޫމާތު ލިބެއެވެ.

މި މައްސަލަ މިހާރު ތަހުގީގުކުރުމުގެ މަސައްކަތް ފުލުހުން ވަނީ ފަށާފައެވެ.