ކެންސަރު ހޮސްޕިޓަލް ޤާއިމްކުރުމަށް އެހީތެރިކަން ހޯދުމަށް އިންޓަރނޭޝަނަލް އެޓަމިކް އެނަޖީ އޭޖެންސީގައި ރާއްޖެއިން ބައިވެރިވުމަށް ނިންމައިފިއެވެ.
އައިއޭއީއޭގައި ރާއްޖެއިން ބައިވެރިވުމަށް ނިންމާފައިވަނީ މިއަދު ބޭއްވުނު ވަޒީރުންގެ މަޖިލީހުގެ ބައްދަލުވުމުގައެވެ. މިއަދު ބޭއްވުނު ވަޒީރުންގެ މަޖިލީހުގައި މިއަދު ވަނީ މިކަމާ ގުޅޭގޮތުން މަޝްވަރާކުރައްވާފައެވެ.
ވަޒީރުންގެ މަޖިލީހުން މިއަދު ނިންމެވި ނިންމެވުންތަކާ ބެހޭ މައުލޫމާތު ދިނުމަށް މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަދައްކަވަމުން ހާރިޖީ ވަޒީރު މޫސާ ޒަމީރު ވިދާޅުވީ، އައިއޭއީއޭގައި ރާއްޖެއިން ބައިވެރިވުމަށް ނިންމީ މުސްތަގްބަލަށް ބަލާއިރު އެ އެޖެންސީގައި ބައިވެރިވުމަކީ މުހިއްމުކަން ބޮޑުކަމުން ކަމަށެވެ. މިގޮތުން ރާއްޖޭގައި ކެންސަރަށް ހާއްސަ ހޮސްޕިޓަލެއް އެޅުމަށް ރައީސް ޑރ.މުއިއްޒު ނިންމަވާފައިވާއިރު، ކެންސަރު ބަލީގެ ހިދުމަތްތައް ދެވެން އަންނަނީ، އިންޓަރނޭޝަނަލް އެޓަމިކް އެނަޖީ އޭޖެންސީގެ މެމްބަރަކަށް ވެގެންކަން ވަޒީރު ފާހަގަކުރެއްވިއެވެ.
މީގެ އިތުރުން ދުނިޔޭގެ އެނަޖީ ނިޒާމް އެޓަމިކް ހަކަތައާ ދިމާލަށް މިސްރާބު ޖެހުމުގެ ފުރުސަތު އޮތްއިރު، ކުރިމަގަށް ބަލާއިރު އެ އޭޖެންސީގައި ބައިވެރިވުމުގެ މުހިއްމުކަން މިނިސްޓަރު ޒަމީރު ފާހަގަކުރެއްވިއެވެ.
މިޒަމާނުގެ މެޑިސިންގައި ވަރަށްބޮޑަށް ބޭނުންވޭ އެޓަމިކް އެޖެންސީގެ އެހީތެރިކަން. އެއީ މިކަމަށް ބޭނުންވާ ބައެއް ކަހަލަ އިކުއިޕްމަންޓް ހޯދުމުގެ އިތުރުން މީގެ ވޭސްޓްމެނޭޖްކުރުމާ މިކަންކަމަކީ އައިއޭއީއޭގެ މެންޑޭޓްގެ ތެރޭގައި ހިމެނިފައިވާ ކަންކަން.
މޫސާ ޒަމީރު ވިދާޅުވިއެވެ
މިހާރު މި އެޖެންސީގައި 178 ޤައުމަކުން ބައިވެރިވެއެވެ. ދެކުނު އޭޝިއާ ސަރަހައްދުގެ ގިނަ ޤައުމުތަކަކީ މިހާރުވެސް އިންޓަރނޭޝަނަލް އެޓަމިކް އެނަޖީ އޭޖެންސީގެ މެމްބަރުންނެވެ. މި ސަރަހައްދުން އައިއޭއީއޭގެ މެމްބަރަކަށް ނުވާ ހަމައެކަނި ދެ ޤައުމަކީ ދިވެހިރާއްޖޭގެ އިތުރުން ބޫޓާނެވެ.
Advertisement
This content is created and paid for by advertisers and does not involve Voice Journalists
