މާލޭގައި އަންހެނަކު ރަހީނުކުރި މައްސަލައާއި ގުޅިގެން ފުލުހުންގެ ބަންދުގައި ހުރި އަތުހަރު އަމިއްލައަށް މަރުވާން މަސައްކަތް ކުރުމާ ގުޅިގެން ހާލުދެރަވެ ވެންޓިލޭޓަރުގައި ފަރުވާދޭން ފަށައިފިއެވެ.
ފުލުހުންގެ ތަރުޖަމާނު އަޙްމަދު ޝިފާން މަޢުލޫމާތު ދެއްވިގޮތުގައި، މާލޭގައި އަންހެނަކު ރަހީނުކުރި މައްސަލައިގައި ހައްޔަރުކޮށްފައިވާ 32 އަހަރުގެ ފިރިހެނަކު ދަންޖެހުމާ ގުޅިގެން މިހާރު ފަރުވާ ދެމުންދަނީ އިންދިރާ ގާންދީ މެމޯރިއަލް ހޮސްޕިޓަލުގެ އިންޓެންސިވް ކެއަރ ޔުނިޓުގައި ވެންޓިލޭޓަރުގެ އެހީގައެވެ.
"އޭނާ މަރުވެފައި ނުވާކަމަށް ހޮސްޕިޓަލުން މަޢުލޫމާތު ދީފައިވޭ. މިހާރު އައިސީޔޫގައި ވެންޓިލޭޓަރުގައި ފަރުވާ ދެމުންދަނީ،"
ޝިފާން ވިދާޅުވިއެވެ.
މި މައްސަލައިގައި ނޭޝަނަލް އިންޓެގްރިޓީ ކޮމިޝަނާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ވަކިވަކިން ތަޙުޤީޤު ފަށައިފައިވާ ކަމަށްވެސް ޝިފާން ހާމަކުރެއްވިއެވެ.
މިދިޔަ މަހުގެ 29 ވަނަ ދުވަހުގެ ރޭ ހިނގި މި ހާދިސާގައި، ގޭގެ ކުއްޔާ ގުޅިގެން އުފެދުނު ޚިލާފަކާ ގުޅިގެން އަނިޔާވެރިވުމަށްފަހު، މި ފިރިހެނާ ވަނީ އޭނާގެ ލޯބިވެރިޔާ ރަހީނުކޮށްފައެވެ. މި މައްސަލަ ފުލުހުންނަށް އެންގުމުން، ފުލުހުން އެ ތަނަށް ދިޔުމުން، އޭނާ ވަނީ އަންހެންމީހާގެ ކަރުގައި ވަޅި ޖައްސައި ފުލުހުންނަށް ބިރުދައްކާފައެވެ. ނަމަވެސް ފުލުހުން ވަނީ ރައްކާތެރިކަމާއެކު އަންހެންމީހާ ސަލާމަތްކޮށް، އޭނާ ހައްޔަރުކޮށްފައެވެ.
Advertisement
This content is created and paid for by advertisers and does not involve Voice Journalists
