ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ހައްޔަރު ކުރުމާ ބެހޭގޮތުން ދޮގު ރިޕޯޓެއް ތައްޔާރުކޮށް ފެތުރުމުގެ މައްސަލަ، ސީރިއަސް މައްސަލައެއްގެ ގޮތުގައި ފުލުހުން ތަޙުޤީޤުކުރަން ފަށައިފިއެވެ.
މިއަދު ފުލުހުން ނެރުނު ނޫސްބަޔާނެއްގައި ބުނެފައިވަނީ، ކުރީގެ ރައީސް ޔާމީން ހައްޔަރުކުރުމަށް ޞައްޙަނޫން ކޯޓު އަމުރެއް ނެރުމާ ގުޅޭ ގޮތުން ފުލުހުން ކުރި ތަޙުޤީޤުގެ ރިޕޯޓު ކަމަށް ބުނެ ދައުރުވަމުންދާ ލިޔުމަކީ ޞައްޙަ ރިޕޯޓެއް ނޫން ކަމަށެވެ. އަދި އެ ރިޕޯޓުގައި ބޭނުންކޮށްފައިވާ ލެޓަރހެޑާއި ފުލުހުންގެ ރަސްމީ ލިޔެކިޔުންތަކުގައި ބޭނުންކުރާ ލެޓަރހެޑާ ދިމާނުވާކަން ފާހަގަކުރެވިފައިވާ ކަމަށް ފުލުހުން ހާމަކޮށްފައިވެއެވެ.
އިތުރަށް ފުލުހުން ފާހަގަކޮށްފައިވަނީ، މި ދޮގު ރިޕޯޓުގައި އޭރުގެ އެކްރެޑިޓިން ކޮމިޝަނަރ އޮފް ޕޮލިސް އަބްދުﷲ ނަވާޒްގެ ނަމުގައި ބޭނުންކޮށްފައިވަނީ ފުލުހުންގެ ޕްރެސް ސްޓޭޓްމަންޓުތަކުގައި ސޮއިކުރައްވާ ފުލުހުންގެ ސްޕޯކްސްޕަރސަން، އެސިސްޓަންޓް ކޮމިޝަނަރ އޮފް ޕޮލިސް އަޙްމަދު ޝިފާންގެ ސޮއި ފޯޖުކޮށްގެން ކަމަށެވެ.
ފުލުހުންގެ ބަޔާނުގައި ވަނީ، "މި ރިޕޯޓަކީ ފުލުހުންގެ ރަސްމީ ލިޔެކިޔުންތަކުގައި ބޭނުންކުރާ ފޯމެޓް ނަކަލުކޮށްގެންނާއި އަދި ފުލުހުންގެ ބައެއް އިސްވެރިންގެ ސޮއި ފޯޖުކޮށްގެން އުފައްދާފައިވާ، އަދި އެކި ގޮތްގޮތުން ބަދަލުގެނެސް އުފައްދާފައިވާ ޞައްޙަނޫން މަޢުލޫމާތުތަކެއް ހިމެނޭ ރިޕޯޓެއް" ކަމަށް ބަޔާންކޮށްފައެވެ.
ފުލުހުން އިތުރަށް ބުނެފައިވަނީ، މި ޞައްޙަނޫން ރިޕޯޓު ފެތުރުމުގެ މައްސަލަ ވަރަށް ސީރިއަސްކޮށް ތަޙުޤީޤުކުރަމުންދާ ކަމަށެވެ.
މީގެއިތުރުން ފުލުހުން ވަނީ އެންޓި ކޮރަޕްޝަން ކޮމިޝަން (އޭސީސީ)ގެ ސައްހަ ނޫން ރިޕޯޓެއް ދައުރުވަމުންދާތީ އެ މައްސަލަ ވެސް ތަހުގީގު ކުރަމުންދާ ކަމަށް ބުނެފަ އެވެ.
ފުލުހުން ވަނީ އާންމުންގެ މެދުގައި އެކިއެކި ފަރާތްތަކާމެދު ނުބައި ތަސައްވުރެއް އުފެދޭ ގޮތަށް ފަތުރާ ސައްހަ ނޫން މައުލޫމާތު ފެތުރުމުގައި ބައިވެރިނުވުމަށްވެސް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
