ނޫސްވެރިންނަށް މަރުގެ އިންޒާރުދޭ ފޭސްބުކް ކޮމެންޓެއްގެ މައްސަލަ ފުލުހުން ބަލަންފަށައިފިއެވެ.
މީހަކު ފޭސްބުކްގައި ނޫސްވެރިންނާ ދެކޮޅަށް މަރުގެ އިންޒާރުދޭ އެ ކޮމެންޓްގެ މައްސަލަ ތަޙުޤީޤުކުރަން ފަށައިފައިވާކަން ފުލުހުންވަނީ ކަށަވަރުކޮށްދީފައެވެ.
މި މައްސަލަ ފާހަގަވީ ޗެނަލް 13 ގެ ޚަބަރަކަށް ކޮމެންޓްކުރި ފަރާތަކުން ނޫސްވެރިންނަށް މަލާމާތްކޮށް، އެ ފަރާތްތައް "މަރަން ޖެހޭ" ކަމަށް ބުނުމުންނެވެ.
ފުލުހުން މަޢުލޫމާތު ދިންގޮތުގައި މި މައްސަލަ ރިޕޯޓުކުރެވި، މިހާރު ދަނީ ތަޙުޤީޤުކުރެވެމުންނެވެ. ނަމަވެސް ތަޙުޤީޤާ ގުޅޭ އިތުރު ތަފްޞީލެއް ހާމަކޮށްފައެއް ނުވެއެވެ.
މީގެ ކުރިން ވެސް ނޫސްވެރިންނަށް އިންޒާރުދީ، ހަމަލާދީ އަދި މަރާލުމުގެ މައްސަލަތައް ފެނިފައިވެއެވެ. މީގެ ތެރޭގައި ނޫސްވެރިޔާ އަޙްމަދު ރިލްވާނާއި ބްލޮގަރ ޔާމީން ރަޝީދުގެ މަރުގެ މައްސަލަތައް ހިމެނެއެވެ.
"ރިޕޯޓާސް ވިތައުޓް ބޯޑާސް" އިން މިދިޔަ މެއި މަހު ޝާއިޢުކުރި ތަފާސްހިސާބުތަކުން ދައްކާގޮތުގައި، ރާއްޖޭގެ ނޫސްވެރިކަމުގެ މިނިވަންކަން ވަނީ 6 ދަރަޖަ ފަހަތަށް ގޮސްފައެވެ. މިދިޔަ އަހަރު ރާއްޖެ އޮތީ 100 ވަނައިގައި ނަމަވެސް، މިއަހަރު 52.36 މާކުހާއެކު 106 ވަނައަށް ވެއްޓި، ނޫސްވެރިކަން ކުރަން އުނދަގޫ ޤައުމުތަކުގެ ލިސްޓަށް ވަދެފައިވެއެވެ.
Advertisement
This content is created and paid for by advertisers and does not involve Voice Journalists
