ހައްދުފަހަނަ އަޅާފައިވާ އިސްރާއީލުން ހިފާފައިވާ ހުޅަނގު އައްސޭރީގައި ބޭއްވި މުޒާހަރާއެއްގައި އެމެރިކާ-ތުރުކީ އެކްޓިވިސްޓަކަށް ބަޑިންހަމަލާދީ މަރާލާފައިވާ ކަމަށް ފަލަސްތީނުގެ ނިއުސް އެޖެންސީ ވަފާ އިން ބުނެފިއެވެ.

މި ހަމަލާގައި މަރާލާފައިވަނީ ނަބްލޫސްގެ ދެކުނުގައި އޮންނަ ބެއިޓާގެ މައުންޓް ސްބެއިހްގައި ގަވައިދާ ހިލާފަށް އިސްރާއީލުން ވަޒަންވެރިކުރުމާ ދެކޮޅަށް ކުރަމުން ދިޔަ މުޒާހަރާގައި އުމުރުން 26 އަހަރުގެ އައިސެނޫރު އެޒްގީ އީގީ އެވެ.

ނަބްލޫސްގެ ރަފީދިއާ ހޮސްޕިޓަލްގެ ވެރިޔާ ފައުއާދު ނަފާ، ނިއުސް އެޖެންސީ ރޮއިޓާސްއަށް މައުލޫމާތު ދެއްވަމުން ވިދާޅުވީ އެޒްގީ އީގީ ހޮސްޕިޓަލަށް ގެނައިރު ބޮލަށް ސީރިއަސް އަނިޔާތަކެއް ލިފައިވާކަމަށާއި ހާލު ވަރަށް ސީރިއަސް ކަމަށެވެ.

Advertisement

މަންޒަރު ދުށް މީހަކު ކަމަށްވާ ޖޮނަތަން ޕޮލަކް އަލްޖަޒީރާއަށް މައުލޫމާތު ދެމުން ބުނީ އެޒްގީ އީގީ ފެނުނީ "ޒައިތޫނި ގަހެއްގެ ދަށުގައި ބިންމަތީގައި އޮށްވައި" ކަމަށެވެ.

ވަފާ ނިއުސް އިން ބުނީ މި ހާދިސާގައި ފަލަސްތީނުގެ އުމުރުން 18 އަހަރުގެ ފިރިހެނަކަށްވެސް އެކިވަރުގެ އަނިޔާ ލިބިފައިވާ ކަމަށެވެ.

އަދި މީގެ އިތުރުން 13 އަހަރުގެ އަންހެން ކުއްޖެއްވެސް ވަނީ ޝަހީދުކޮށްލާފައެވެ.