ބީޖޭޕީގެ އިއްތިހާދު ސަރުކާރުގެ ބެލުމުގެ ދަށުން އިންޑިއާގެ މުސްލިމުންނަށް އަނިޔާކުރުން އިތުރުވަމުން ދާކަމަށް އެގައުމުގެ މުސްލިމުން ބުނެފިއެވެ. 

މިދިޔަ އިންތިޚާބުގައި އިންޑިއާގެ ވެރިކަންކުރާ ޕާޓީ ބީޖޭޕީއަށް ލިބުނު ނާކާމިޔާބީއާ ގުޅިގެން، އެ ޤައުމުގެ މުސްލިމުންނަށް ކުރަމުންދާ އަނިޔާތައް މަދުވާނެކަމުގެ އުއްމީދު އުފެދުނެވެ. ނަމަވެސް، އިއްތިހާދު ސަރުކާރެއް އުފެދުމަށްފަހުވެސް މުސްލިމުންގެ މައްޗަށް ދެވޭ ހަމަލާތައް ހުއްޓިފައިނުވާކަމަށް އެ ޤައުމުގެ މުސްލިމުން ބުނެއެވެ.

އިންތިޚާބަށްފަހު އުފެދުނު އައު ސަރުކާރުގައި ހުރިހާ ފަރާތްތަކެއް ހިމެނޭނެކަމުގެ އުއްމީދު ބޮޑުވި ނަމަވެސް، އެފަދަ މާހައުލެއް ޤާއިމުވެފައިނުވާކަމަށް މުސްލިމުން ފާހަގަކުރެއެވެ. އަދި މުސްލިމުންނަށް އަމާޒުކޮށް ދެވޭ ހަމަލާތައް ދަނީ ކުރިއަށް ކަމަށްވެސް އެފަރާތްތަކުން ބުނެއެވެ.

Advertisement

މި ކަންކަމާ ގުޅޭގޮތުން ސަރުކާރުން އަދި އެއްވެސް ބަޔާނެއް ނެރެފައިނުވާއިރު، އިންޑިއާގެ މުސްލިމު ޖަމާޢަތްތަކުން ވަނީ މި ކަންކަން ހުއްޓުވުމަށް ސަރުކާރަށް ގޮވާލާފައެވެ. އަދި މުސްލިމުންނަށް އަމާޒުކޮށް ކުރެވޭ އަނިޔާތަކާއި ހަމަލާތަކުގެ ސަބަބުން އެ ޤައުމުގެ އެތެރޭގެ ހަމަޖެހުމަށް ނޭދެވޭ އަސަރުކުރާނެކަމަށްވެސް އެފަރާތްތަކުން ބުނެފައިވެއެވެ.

އިންޑިއާގެ މުސްލިމުންގެ ޝަކުވާތައް އިތުރުވަމުންދާއިރު، މިދިޔަ މަހު އުއްތަރު ޕްރަދޭޝް އަދި މަދިޔަ ޕްރަދޭޝްގައި މުސްލިމުންނަށް އަމާޒުކޮށް ހިންގުނު ހަމަލާތަކުގެ ސަބަބުން 5 މީހަކު މަރުވެ، 50 އަށްވުރެ ގިނަ މީހުން ޒަޚަމްވިއެވެ. މީގެ އިތުރުން، ރާޖަސްތާންގައި ހުރި މިސްކިތެއް ރޯކޮށްލުމުގެ ހާދިސާއެއް ހިނގައި، ގުޖުރާތުގައި މުސްލިމު ވިޔަފާރިވެރިންގެ ފިހާރަތަކަކަށް ގެއްލުން ދިނުމުގެ ހާދިސާއެއްވެސް ހިނގާފައިވެއެވެ.

މި ހާދިސާތަކާ ގުޅިގެން ގިނަ އަދަދެއްގެ މުސްލިމުން ހައްޔަރުކޮށްފައިވާއިރު، ހަމަލާ ދިން ފަރާތްތަކުގެ ތެރެއިން މަދު ބަޔަކު ނޫނީ ހައްޔަރުކޮށްފައިނުވާކަމަށް އިންޑިއާގެ މުސްލިމު ޖަމާޢަތްތަކުން ބުނެއެވެ.