ޕާކިސްތާނުގެ ކަނޑުގެ ސަރަހައްދުން ޕެޓްރޯލިއަމް އަދި ގުދުރަތީ ގޭހުގެ ބޮޑު ޑިޕޮސިޓެއް ފެނިފައިވާކަމަށް މީޑިއާ ރިޕޯޓުތަކުން ބުނެފިއެވެ.

ސެކިއުރިޓީގެ އިސް އޮފިޝަލަކާ ހަވާލާދީ ޑޮންނިއުސްޓީވީން ބުނީ ތެލާއި ގޭހުގެ ރިޒާވް ހުރިތޯ ބެލުމަށް އެކުވެރި ގައުމަކާ ގުޅިގެން ތިން އަހަރު ދުވަހުގެ ސާވޭއެއް ކުރިއަށް ގެންގޮސްފައިވާ ކަމަށެވެ.

ޖިއޮގްރަފިކް ސާވޭގެ ސަބަބުން ޕާކިސްތާނަށް ޑިޕޮސިޓްތައް ހުރި ތަނެއް ދެނެގަތުމުގެ ފުރުސަތު ލިބިފައިވާއިރު، ޕާކިސްތާނުގެ ކަނޑުގެ ސަރަހައްދުން ފެނުނު ވަސީލަތްތައް ކަމާ ބެހޭ ޑިޕާޓްމަންޓްތަކުން ވަނީ ސަރުކާރަށް އަންގާފަ އެވެ.

އަންދާޒާތައް ދައްކާ ގޮތުން މި ހޯދުމަކީ ދުނިޔޭގެ އެންމެ ބޮޑު ތެލާއި ގޭހުގެ ރިޒާވްގެ ތެރޭގައި ހިމެނޭ ސަރަހައްދަކަށް ވެދާނެ ކަމަށާއި، ޕާކިސްތާނަކީ ދުނިޔޭގެ ހަތަރު ވަނައަށް އެންމެ ބޮޑު ޑިޕޮސިޓެއް އޮންނަ ގައުމަކަށް ވެދާނެ ކަމަށްވަނީ އަންދާޒާކޮށްފައެވެ.

މިހާރު ދުނިޔޭގައި އެންމެ ބޮޑު ތެލުގެ ރިޒާވް އޮތް ގައުމަކީ ގާތްގަނޑަކަށް 3.4 ބިލިއަން ފީފާ ތެލުގެ ރިޒާވްއާއެކު ވެނެޒުއެލާ އެވެ. އެންމެ ގިނައިން ބޭނުން ނުކުރެވި ހުރި ޝޭލް ތެލުގެ ރިޒާވް އޮތީ އެމެރިކާގަ އެވެ. އަދި ސައުދީ އަރަބިއްޔާ، އީރާން، ކެނެޑާ އަދި އިރާގު ހިމެނެނީ އެންމެ ބޮޑެތި ތެލުގެ ރިޒާވް އޮތް ފަސް ގައުމުގެ ތެރޭގަ އެވެ.

އޮއިލް އެންޑް ފޭސް ރިޒާވް އޮތޯރިޓީގައި މަސައްކަތްކުރި މާހިރެއް ކަމަށްވާ މުހައްމަދު އާރިފް ޑައުންނިއުސް ޓީވީގައި ވިދާޅުވި ގޮތުގައި ވަޅު ކޮނެގެން ތެޔޮ ނެރުމުގެ މަސައްކަތަށް އެތައް އަހަރެއް ނަގާފާނޭކަމަށާއި ލަފާކުރެވޭ ގޮތަށް ރިޒާވްތައް ހޯދިދާނެ ކަމުގެ 100 އިންސައްތަ ޔަގީންކަމެއް ނެތް ކަމަށްވެސް އޭނާ ފާހަގަކުރެއްވި އެވެ.

އާރިފް އިތުރަށް ވިދާޅުވި ގޮތުގައި އެކްސްޕްލޯރޭޝަން އަށް އެކަނި ވެސް ގާތްގަނޑަކަށް ފަސް ބިލިއަން ޑޮލަރުގެ ބޮޑު އިންވެސްޓްމަންޓެއް ކުރަން ޖެހޭނެ އެވެ. އަދި ކަނޑުގެ ލޮކޭޝަނަކުން ރިޒާވް ނެގުމަށް ހަތަރު އަހަރާއި ފަސް އަހަރާ ދެމެދުގެ މުއްދަތެއް ނަގާފާނެ ކަމަށް އޭނާ ލަފާކުރެއްވި އެވެ. މީގެ އިތުރުން، އެކްސްޕްލޯރޭޝަންގެ ސަބަބުން ރިޒާވް ހޯދިއްޖެ ނަމަ ވަ ވަޅުތަކާއި ރިޒާވް ނެގުމާއި ތެޔޮ އުފެއްދުމަށް އިންފްރާސްޓްރަކްޗާ ގާއިމްކުރުމަށް އިތުރު އިންވެސްޓްމަންޓެއް ބޭނުންވާނެ ކަމަށްވެސް އޭނާ ފާހަގަކުރެއްވި އެވެ.