މާލެ ސަރަޙައްދުގައި އެކްސިޑެންޓްތައް ގިނަވަމުން ދިއުމާ ގުޅިގެން، ފުލުހުން ވަނީ މަގުމަތީގެ ސަލާމަތަށް އަމާޒުކޮށް ޚާއްޞަ އޮޕަރޭޝަނެއް ފަށައިފިއެވެ.
ފުލުހުންގެ އިޖްތިމާޢީ ވިއުގަތަކުގައި ހިއްސާކުރި މަޢުލޫމާތުގައިވާ ގޮތުން، މި އޮޕަރޭޝަންގެ ދަށުން މާލެ އާއި ހުޅުމާލޭގެ އެކި ހިސާބުތަކުގައި އުޅަނދުފަހަރު ބަލައި ފާސްކުރުމަށް ޗެކްޕޮއިންޓްތަކެއް ޤާއިމުކޮށްފައިވެއެވެ. އަދި މަގުމަތީގެ ސަލާމަތާ ގުޅޭގޮތުން ރައްޔިތުން ހޭލުންތެރިކުރުމުގެ މަސައްކަތްތަކެއް ވެސް ކުރިއަށް ގެންދާ ކަމަށް ބުނެފައިވެއެވެ.
"އުޅަނދު ދުއްވުމުގެ ކުރިން ރައްކާތެރިކަމުގެ ގޮތުން ފުރިހަމަކުރަންޖެހޭ ހުރިހާ ކަމެއް ފުރިހަމަިހަމަކޮށްފައިވާކަން ޔަޤީންކުރުމަށް" ފުލުހުން ވަނީ އާންމުންނަށް ގޮވާލާފައެވެ.
މި އޮޕަރޭޝަން ފެށުނުއިރު، ފާއިތުވި ދުވަސްތަކުގައި މާލެ ސަރަޙައްދުގައި އެކްސިޑެންޓްތައް އިތުރުވެފައިވާކަން ފާހަގަކުރެވެއެވެ. މިގޮތުން، މާލެ އާއި ހުޅުމާލޭގައި ވޭތުވެދިޔަ ހަފުތާގައި ހިނގި ދެ އެކްސިޑެންޓެއްގައި ދެ ޒުވާނެއްގެ ފުރާނަ ގެއްލިފައިވެއެވެ. އަދި މި ރޭ ވެސް ދެ ސައިކަލު ޖެހި އެކްސިޑެންޓެއް ހިނގައި، ތިން މީހަކަށް އަނިޔާވެފައިވާކަން ފާހަގަކުރެވެއެވެ.
ފުލުހުންގެ ވެބްސައިޓުގައި ޝާއިޢުކޮށްފައިވާ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ރާއްޖޭގައި 1,900 އަށްވުރެ ގިނަ އެކްސިޑެންޓް ހިނގާފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު މަތީ އަދަދެކެވެ. މިދިޔަ އަހަރުގެ އޮގަސްޓު މަހާ ހަމައަށް ރާއްޖޭގައި ހިނގާފައިވަނީ 1,476 އެކްސިޑެންޓެވެ. މީގެ ތެރެއިން ގިނަ އެކްސިޑެންޓްތައް ހިނގާފައިވަނީ މާލެ ސަރަޙައްދުގައި ކަމަށްވާއިރު، 125 މީހަކަށް އަނިޔާވެ، ފަސް މީހަކު މަރުވެފައިވެއެވެ.
މި އަހަރު އެންމެ ގިނަ އެކްސިޑެންޓް ރިކޯޑުކުރެވިފައިވަނީ މާރިޗު މަހުގައެވެ. އެ މަހު އެކަނި 300 އަށްވުރެ ގިނަ އެކްސިޑެންޓް ރާއްޖޭގައި ހިނގާފައިވެއެވެ. އެހެން މަސްތަކުގައި އެވްރެޖްކޮށް 200 އަށްވުރެ ގިނަ އެކްސިޑެންޓް ހިނގާފައިވާކަން ފާހަގަކުރެވެއެވެ.
Advertisement
This content is created and paid for by advertisers and does not involve Voice Journalists
