މާލޭ ސޯސަން މަގުގައި ހުންނަ "ގާމަގު ކެފޭ" ހިންގާ ހ. ދޫހިމިރި ގޭގައި މިއަދު ދެވަނަ ފަހަރަށް އަލިފާން ރޯވެއްޖެއެވެ. މި ހާދިސާއާ ގުޅިގެން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ އަލިފާން ނިއްވާ ޔުނިޓުން މިވަގުތު އެތަނުގައި ހަރަކާތްތެރިވަމުން ދާކަމަށް މަޢުލޫމާތު ލިބެއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނެފައިވަނީ، އެ އިމާރާތުގައި އަނެއްކާވެސް އަލިފާން ރޯވެފައިވާ ކަމަށެވެ. މިއީ މިއަދު މި އިމާރާތުގައި ރޯވި ދެވަނަ ފަހަރެވެ. ކުރިން އެ ގޭގައި އަލިފާން ރޯވެފައިވަނީ މެންދުރު 14:47 ހާއިރުއެވެ.
ފުރަތަމަ ހާދިސާގައި 22 ދިވެހިންނާއި 15 ބިދޭސީން ހިމެނޭހެން ޖުމްލަ 37 މީހުން ހާލުގައި ޖެހުނު ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ހާމަކޮށްފައިވެއެވެ. ނަމަވެސް، ދެވަނަ ފަހަރަށް ރޯވި އަލިފާނުގެ ސަބަބުން އިތުރު މީހުން ހާލުގައި ޖެހުނުކަން އަދި ކަށަވަރުވެފައެއް ނުވެއެވެ.
މި ހާދިސާއާ ގުޅިގެން ސަލާމަތީ ޚިދުމަތްތަކުން ދަނީ އެ ސަރަހައްދު ބަންދުކޮށް، އަލިފާން ނިއްވުމުގެ މަސައްކަތް ކުރަމުންނެވެ. އަދި ހާދިސާގެ ސަބަބުން ގެއްލުން ލިބުނު މިންވަރާއި އަލިފާން ރޯވި ސަބަބު ބަލައި ތަޙްޤީޤު ކުރަމުންދާ ކަމަށްވެސް އިސް ފަރާތްތަކުން މަޢުލޫމާތު ދެއެވެ.
މި ހާދިސާއާ ގުޅޭ އިތުރު މަޢުލޫމާތު ލިބުމުން އަޅުގަނޑުމެން ހިއްސާ ކުރާނަމެވެ.
Advertisement
This content is created and paid for by advertisers and does not involve Voice Journalists
