ހުޅުމާލޭގައި ހިނގި އެކްސިޑެންޓާ ގުޅޭ އަސާސެއް ނެތް ވާހަކަތައް ނުފެތުރުމަށް ފުލުހުން އެދިއްޖެއެވެ. 

ފުލުހުން ވަނީ ހުޅުމާލޭގެ ސެންޓްރަލް ޕާކު ސަރަހައްދުގައި ހިނގި އެކްސިޑެންޓެއްގައި ނިޔާވި ލ. އިސްދޫ / ބީޗްހައުސް، ހަސަން ސަމާހުގެ މަރުގެ ތަޙުޤީޤާ ގުޅޭ ގޮތުން އަސާސް ނެތް ވާހަކަތައް ނުފެތުރުމަށް އިލްތިމާސްކޮށްފައެވެ.

މިދިޔަ ބުރާސްފަތި ދުވަހުގެ ރޭ ހިނގި މި ހާދިސާއާ ގުޅިގެން ސޯޝަލް މީޑިއާގައި އެކި ގޮތްގޮތަށް ވާހަކަތައް ފެތުރެމުންދާއިރު، ފުލުހުން ބުނެފައިވަނީ މިހާތަނަށް މި މައްސަލައިގެ ތަޙުޤީޤާ ގުޅޭ އެއްވެސް މަޢުލޫމާތެއް އެއްވެސް ފަރާތަކާ ހިއްސާކޮށްފައިނުވާ ކަމަށެވެ.

Advertisement

ފުލުހުން އިތުރަށް ބުނެފައިވަނީ، މި ހާދިސާއާ ގުޅިގެން އަސާސެއް ނެތް ތުހުމަތުތައް ކުރުމަކީ މަރުޙޫމްގެ ޢާއިލާއަށް އިތުރު ހިތްދަތިކަން ލިބި، ތަޙުޤީޤަށް ހުރަސްއެޅިދާނެ ކަމެއް ކަމަށެވެ. އަދި ސައްޙަކަން ކަށަވަރު ނުކުރެވޭ މަޢުލޫމާތު އެއްވެސް ވަސީލަތެއްގައި ނުފެތުރުމަށް އިލްތިމާސްކޮށްފައިވެއެވެ.

ސަމާހު ނިޔާވީ ބާރު ސްޕީޑެއްގައި ދުއްވަމުންދިޔަ ސްޕޯޓްސް ކާރަކާ އޭނާ ދުއްވަމުންދިޔަ ސައިކަލު ޖެހި އެކްސިޑެންޓްވުމުންނެވެ. މި ހާދިސާގައި ސަމާހުގެ ބޮލަށާއި މޫނަށް ސީރިއަސް އަނިޔާތަކެއްވެ، ގިނަ އަދަދަކަށް ލޭ ބޭރުވުމަށްފަހު، ހުޅުމާލެ ހޮސްޕިޓަލުގައި ފަރުވާދެމުންދަނިކޮށް ނިޔާވިއެވެ.

މި ހާދިސާއާ ގުޅިގެން، ސްޕޯޓްސް ކާރު ދުއްވަމުންދިޔަ އައްޑޫ ސިޓީ ހިތަދޫ ވައިލެޓްފެހި، 26 އަހަރުގެ މުޙައްމަދު ވިސާމް ސިއްދީޤު ވަނީ ހައްޔަރުކޮށްފައެވެ.