ބޮޑެތި ޒަޚަމް ތަކަކާއެކު ނ. ހޮޅުދޫގައި މަރުވެފައި އޮއްވާ ފެނުނު 50 އަހަރުގެ ޒަކިއްޔާ މޫސާގެ ހަށިގަނޑު ފުލުހުންގެ ތަހުގީގަށް މާލެގެނައުމަށް ފުރާފައިވާކަމަށް އެރަށު ކައުންސިލުން މައުލޫމާތު ދީފިއެވެ. 

ޒަކިއްޔާގެ މަރުގެ މައްސަލައާއި ގުޅިގެން ފުލުހުންގެ ޚާއްޞަ ޓީމެއް ވަނީ މިއަދު އެ ރަށަށް ފޮނުވާފައެވެ.

މަރުވެފައި އޮއްވާ މިއަދު ހެނދުނު ފެނުނު ޒަކިއްޔާގެ ކަރުގައި ޒަޚަމްތަކެއް ހުރި ކަމަށާއި، އޭނާގެ ކައިރީގައި ވަޅިއެއް އޮތް ކަމަށް ވަނީ މައުލޫމާތު ލިބިފައެވެ.

Advertisement

ޒަކިއްޔާއަކީ ނަފްސާނީ ބައްޔަކަށް ފަރުވާ ހޯދާފައިވާ މީހެއް ކަމަށް އެ ރަށުމީހުން ބުނެފައިވިޔަސް، މިކަން ރަސްމީކޮށް އެއްވެސް އިދާރާއަކުން އަދި ކަށަވަރުކޮށްދީފައެއް ނުވެއެވެ.

މަރުވުމުގެ ކުޑައިރުކޮޅެއް ކުރިން ޒަކިއްޔާ ބައެއް މީހުންނާ ވާހަކަދައްކާފައިވާ ކަމަށް ރަށުގެ މީހުން ވޮއިސް އަށް ކިޔައިދިނެވެ.  އެރަށުގެ ބައެއް ޢާއްމުމީހުންނާ ވޮއިސް އިން ގުޅުމުން ބުނީ ޒަކިއްޔާގެ ބޭރުފުށުން އެއްވެސް ބައްޔެއްގެ އަލާމާތެއް ފެންނަން ނުހުންނަ ކަމުގައެވެ. 

މި ހާދިސާއާ ގުޅިގެން އެއްވެސް މީހަކަށް ޝައްކުކުރެވޭ ކަމަށް އަދި ފުލުހުން ހާމަކޮށްފައި ނުވާއިރު، މާބޮޑު މައުލޫމާތެއްވެސް އަދި މިހާތަނަށް ފުލުހުން ހާމަކޮށްފައެއް ނުވެއެވެ.