ޒަޚަމް ތަކަކާއެކު ނ. ހޮޅުދޫ ގެއެއްގައި އިއްޔެ މަރުވެފައި އޮއްވާ ފެނުނު 50 އަހަރުގެ ޒަކިއްޔާ މޫސާގެ ހަށިގަނޑު ފުލުހުންގެ ތަހުގީގަށް މާލެގެނެސްފިއެވެ. 

ފުލުހުން މިއަދު ބުނެފައިވާ ގޮތުން، ޒަކިއްޔާގެ ހަށިގަނޑު މާލެ ގެނައީ ރޭ ދަންވަރުގެ ވަގުތެއްގައެވެ.

ޒަކިއްޔާގެ މަރުގެ މައްސަލައާއި ގުޅިގެން ފުލުހުންގެ ޚާއްޞަ ޓީމެއް ވަނީ މިއަދު އެ ރަށަށް ފޮނުވާފައިވާއިރު، މައްސަލައާއި ގުޚިގެން އެއްވެސް މީހަކު އަދި ހައްޔަރު ނުކުރާ ކަމަށް ފުލުހުން މައުލޫމާތު ދެއެވެ. 

Advertisement

ނަމަވެސް ތަހުގީގު އަދިވެސް ދަނީ ކުރިއަށެވެ. 

މަރުވެފައި އޮއްވާ އިއްޔެ ހެނދުނު ފެނުނު ޒަކިއްޔާގެ ކަރުގައި ޒަޚަމްތަކެއް ހުރި ކަމަށާއި، އޭނާގެ ކައިރީގައި ވަޅިއެއް އޮތް ކަމަށް ވަނީ މައުލޫމާތު ލިބިފައެވެ.

ޒަކިއްޔާއަކީ ނަފްސާނީ ބައްޔަކަށް ފަރުވާ ހޯދާފައިވާ މީހެއް ކަމަށް އެ ރަށުމީހުން ބުނެފައިވިޔަސް، މިކަން ރަސްމީކޮށް އެއްވެސް އިދާރާއަކުން އަދި ކަށަވަރުކޮށްދީފައެއް ނުވެއެވެ. 

މަރުވުމުގެ ކުޑައިރުކޮޅެއް ކުރިން ޒަކިއްޔާ ބައެއް މީހުންނާ ވާހަކަދައްކާފައިވާ ކަމަށް ރަށުގެ މީހުން ވޮއިސް އަށް ކިޔައިދިނެވެ.  އެރަށުގެ ބައެއް ޢާއްމުމީހުންނާ ވޮއިސް އިން ގުޅުމުން ބުނީ ޒަކިއްޔާގެ ބޭރުފުށުން އެއްވެސް ބައްޔެއްގެ އަލާމާތެއް ފެންނަން ނުހުންނަ ކަމުގައެވެ. 

މި ހާދިސާއާ ގުޅިގެން އެއްވެސް މީހަކަށް ޝައްކުކުރެވޭ ކަމަށް އަދި ފުލުހުން ހާމަކޮށްފައި ނުވާއިރު، މާބޮޑު މައުލޫމާތެއްވެސް އަދި މިހާތަނަށް ފުލުހުން ހާމަކޮށްފައެއް ނުވެއެވެ.