ތިލަމާލެ ބްރިޖުގެ މަސައްކަތް ޓައިމްލައިނާއި އެއްގޮތަށް ކުރިއަށް ގެންދިޔުމަށް އިންޑިޔާއާައެކު މަޝްވަރާ ކޮށްފިއެވެ.

ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރ ޑރ. ޢަބްދުالله މުއްޠަލިބް އިންޑިޔާއަށް ކުރައްވަމުންދާ ރަސްމީ ދަތުރުފުޅުގައި، ގްރޭޓަރ މާލެ ކަނެކްޓިިވިޓީ - މާލެއިން ތިލަފުއްޓަށް ގުޅާލާ ބްރިޖް މަޝްރޫޢުގެ 12 ވަނަ ޖޮއިންޓް ޕްރޮޖެކްޓް މޮނިޓަރިންގ ކޮމިޓީގެ ބައްދަލުވުމުން ވަނޫ ބާއްވައިފައެވެ.

މި ބައްދަލުވުމުގައި ޑރ. މުއްޠަލިބްގެ އިތުރުން ދިވެހިރާއްޖޭގައި ހުންނަވާ އިންޑިޔާގެ ހައި ކޮމިޝަނަރ އެޗް.އީ. މުނު މަހާވަރ ބައިވެރިވެވަޑައިގެންނެވިއެވެ.

Advertisement

އަދި ދިވެހި ސަރުކާރުގެ ފަރާތުން ސްޓޭޓް މިނިސްޓަރ އިބްރާހީމް ތޯއަމް މުޙައްމަދު، ސްޓޭޓް މިނިސްޓަރ އިސްމާޢީލް ޙަމީދު އަދި މިނިސްޓްރީގެ ޓެކްނިކަލް ޓީމާއި މާލިއްޔަތު އަދި ޚާރިޖީ ވުޒާރާގެ އިސް ބޭފުޅުން ބައިވެރިވެވަޑައިގެންނެވިއެވެ.

ކޮންސްޓްރަކްޝަން މިނިސްޓްރީން ބުނެފައިވާ ގޮތުން މި ބައްދަލުވުމުގައި މަޝްރޫޢު ކުރިއަށްދާ މިންވަރާއި ގުޅޭގޮތުން ސްޓްރެޓެޖިކް އަދި ޓެކްނިކަލް މަޝްވަރާތައް ކުރެވުނެވެ. މީގެ މައިގަނޑު މަޤްޞަދަކީ މަޝްރޫޢުގެ މަސައްކަތްތައް ކަނޑައެޅިފައިވާ މުއްދަތުގައި ނިންމުމަށްޓަކައި ސަރުކާރުގެ އެންމެ އިސްފަންތީގެ ބޭފުޅުންގެ ބައިވެރިވުން ކަށަވަރުކުރުން ކަމަށް ބުންޏެވެ.

މިހާތަނަށް މަޝްރޫޢުގެ 43.59 އިންސައްތަ މަސައްކަތް ނިމިފައިވާކަމަށް ކޮންސްޓްރަކްޝަން މިނިސްޓްރީން ހާމަކޮށްފައިވެއެވެ. މާލެއިން ގުޅީފަޅާ ހަމައަށް މަޝްރޫޢު ނިންމުމަށް ކަނޑައަޅާފައިވަނީ 2026 ވަނަ އަހަރުގެ މާރޗް 31 ވަނަ ދުވަހެވެ. އަދި ގުޅީފަޅުން ތިލަފުއްޓާ ހަމައަށް ނިންމުމަށް ކަނޑައަޅާފައިވަނީ 2026 ވަނަ އަހަރުގެ ސެޕްޓެމްބަރ 30 ވަނަ ދުވަހެވެ.

މި ބައްދަލުވުމުގައި އިންޑިޔާ ސަރުކާރުގެ ފަރާތުން ޚާރިޖީ ވުޒާރާގެ އިސް ބޭފުޅުންނާއި، އެގްޒިމް ބޭންކް އޮފް އިންޑިޔާގެ އިތުރުން މަޝްރޫޢުގެ ކޮންޓްރެކްޓަރ އަދި ކޮންސަލްޓަންޓްގެ ފަރާތުން ބައިވެރިވިއެވެ.