ޕީއެންސީ މެންބަރުންނަށް ފައިސާ ދޭކަމަށް ބުނެ ދޮގު ވާހަކަ ފަތުރަނީ ކުރީގެ ރައީސް ޔާމީން އަޑީގައި ހުރެގެން ކަމަށް ޕީޖީ ލީޑަރު ތުހުމަތުކުރައްވައިފިއެވެ. 

ޕީއެންސީގެ ޕީޖީ ލީޑަރު އިބްރާހީމް ފަލާހު ވަނީ، ރައީސް ޑރ. މުޙައްމަދު މުޢިއްޒު އެ ޕާޓީގެ މަޖިލިސް މެންބަރުންނަށް މަހަކު 75،000 ރުފިޔާ ދެއްވާ ކަމަށް ބުނެ ފެތުރެމުންދާ ވާހަކަތަކުގެ ފަހަތުގައި ހުރީ ކުރީގެ ރައީސް ޢަބްދުﷲ ޔާމީން ކަމަށް ތުހުމަތުކުރައްވާ އެވާހަކަތަކަށް ހަރުކަށި ރައްދު ދެއްވާފައެވެ.

މިރޭ ބޭއްވުނު މަޖިލިސް ޖަލްސާއަށްފަހު މީޑިއާއަށް ދެއްވި އިންޓަވިއުއެއްގައި ފަލާހު ވިދާޅުވީ، މި ވާހަކަތަކަކީ ޕީއެންސީގެ 75 މަޖިލިސް މެންބަރުންގެ އަބުރަށް އަރައިގަންނަ ބޮޑު އިލްޒާމެއް ކަމަށެވެ. އޭނާ ތުހުމަތުކުރެއްވި ގޮތުގައި ޔާމީނު މި ވާހަކަތައް ފަތުރުއްވަނީ ނޫސްތަކަށް ފައިސާ ދެއްވައިގެންނެވެ.

Advertisement

ފަލާހު އިތުރަށް ވިދާޅުވީ ޕީއެންސީއަށް އަލަށް ގުޅޭ މެންބަރުންގެ ފޯމުތައް ގެންދިޔުމާ ގުޅިގެންވެސް ފައިސާ ބަހާ ވާހަކަ ދައްކަމުންދާ ކަމަށެވެ. ދުވާފަރު ދާއިރާގެ މެންބަރު ކަޅު ދަބަހެއްގައި ފައިސާ ގެންދިޔަ ކަމަށް ބުނާ ވާހަކައަށް ރައްދު ދެއްވަމުން ފަލާހު ވިދާޅުވީ، އެއީ އާބާދީ ބޮޑު ރަށަކުން ގެނައި ގިނަ ފޯމުތަކެއް ކަމަށެވެ.

ރައީސް މުޢިއްޒަކީ ކޮރަޕްޝަނާއި ވައްކަމަށް ބާރުއަޅުއްވާނެ ބޭފުޅެއް ނޫން ކަމަށް ފަލާހު ވިދާޅުވިއެވެ.

މި ވާހަކަތައް ފެތުރެން ފެށުމާއެކު ސަރުކާރުން ވަނީ މިކަން ދޮގުކޮށް، މި ވާހަކަ ފަތުރާ ފަރާތްތަކާމެދު ފިޔަވަޅު އަޅަން ނިންމާފައެވެ. ޕީއެންސީއަށް މަޖިލީހުގެ ސުޕަ މެޖޯރިޓީ އޮތްއިރު، މި މައްސަލައިގައި އިތުރު ތަޙުޤީޤުތައް ކުރިއަށްދާނެކަމަށް ބެލެވެއެވެ.