ނ. ހޮޅުދޫގައި ޒަހަމްތަކަކާއި އެކީ ނިޔާވެފައި އޮއްވާ މިމަހު 10 ވަނަ ދުވަހު ފެނުނު އެރަށު މާރަނގަ، ޒަކިއްޔާ މޫސާ މަނިކުގެ ހަށިގަނޑު މާލެ ގެނެސް ޓެސްޓުތައް ހެދުމަށްފަހު، އޭނާގެ ހަށިގަނޑު އަނބުރާ އެރަށަށް ގެންގޮސްފިއެވެ.
އުމުރުން 50 އަހަރުގެ ޒަކިއްޔާ ނިޔާވެފައި އޮއްވާ ފެނުނީ އޭނާ ދިރިއުޅޭ ގޭގެ ބަދިގެ ފަރާތުގައި ހުންނަ ގުދަނެއް ކައިރިންނެވެ.
ޒަކިއްޔާގެ މަރުގެ މައްސަލައާއި ގުޅިގެން ފުލުހުންގެ ޚާއްޞަ ޓީމެއް އެ ރަށަށް ފޮނުވާފައިވާއިރު، މައްސަލައާއި ގުޚިގެން އެއްވެސް މީހަކު އަދި ހައްޔަރު ނުކުރާ ކަމަށް ފުލުހުން މައުލޫމާތު ދެއެވެ.
ނަމަވެސް ތަހުގީގު އަދިވެސް ދަނީ ކުރިއަށެވެ.
މަރުވެފައި އޮއްވާ ފެނުނު ޒަކިއްޔާގެ ކަރުގައި ޒަޚަމްތަކެއް ހުރި ކަމަށާއި، އޭނާގެ ކައިރީގައި ވަޅިއެއް އޮތް ކަމަށް ވަނީ މައުލޫމާތު ލިބިފައެވެ.
ޒަކިއްޔާއަކީ ނަފްސާނީ ބައްޔަކަށް ފަރުވާ ހޯދާފައިވާ މީހެއް ކަމަށް އެ ރަށުމީހުން ބުނެފައިވިޔަސް، މިކަން ރަސްމީކޮށް އެއްވެސް އިދާރާއަކުން އަދި ކަށަވަރުކޮށްދީފައެއް ނުވެއެވެ.
މަރުވުމުގެ ކުޑައިރުކޮޅެއް ކުރިން ޒަކިއްޔާ ބައެއް މީހުންނާ ވާހަކަދައްކާފައިވާ ކަމަށް ރަށުގެ މީހުން ވޮއިސް އަށް ކިޔައިދިނެވެ. އެރަށުގެ ބައެއް ޢާއްމުމީހުންނާ ވޮއިސް އިން ގުޅުމުން ބުނީ ޒަކިއްޔާގެ ބޭރުފުށުން އެއްވެސް ބައްޔެއްގެ އަލާމާތެއް ފެންނަން ނުހުންނަ ކަމުގައެވެ.
މި ހާދިސާއާ ގުޅިގެން އެއްވެސް މީހަކަށް ޝައްކުކުރެވޭ ކަމަށް އަދި ފުލުހުން ހާމަކޮށްފައި ނުވާއިރު، މާބޮޑު މައުލޫމާތެއްވެސް އަދި މިހާތަނަށް ފުލުހުން ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
