އާސަންދައިގެ ދަށުން ބެންގަލޫރުގެ އެސްޓަރ ސީ.އެމް.އައި އިން ފަރުވާ ހޯދަމުންދިޔަ ބަލިމީހަކަށް އާސަންދަ ކަނޑާލިކަމަށް ދައުރުވަމުންދާ ޙަޤީޤަތާ ޚިލާފު ވާހަކަތަކެއް ކަމަށް އާސަންދައިން ބުނެފިއެވެ. 

އާސަންދައިގެ ދަށުން ންގަލޫރުގެ އެސްޓަރ ސީއެމް.އައި އިން ފަރުވާ ހޯދމުންދިޔަ ބަލިމީހަކަށް އާސަންދަ އެއްކޮށް ކަނޑާލާ އާއިލާއެއް ޙާލުގައި ޖައްސާފައިވާ ކަމަށް ބުނެ ސޯޝަލްމީޑިއާގައި ފެތުރެމުންދާ ވާހަކަ އާއި ގުޅިގެ ް އާސަންދައިން ނެރުނު ނޫސް ބަޔާނެއްގައި ބުނީ، އުމުރުން 65 އަހަރުގެ އެމީހާއަކީ އެއަރ އެމްބިއުލާންސް މެދުވެރިކޮށް ސައުދީ އަރަބިއާގެ ޖިއްދާއިން އިންޑިއަށް ޒަކާތުފަނޑުގެ އެހީގައި ގެންދެވިފައިވާ މީހެއް ކަމަށެވެ.

މިގޮތުން އާސަންދަ، އެންސްޕާ އަދި ޒަކާތު ފަންޑު ހިމަނައިގެން ދައުލަތުގެ ފރާތުން އެހީގެ ގޮތުގައި ގާތްގަނޑަކަށް 1.5 މިލިއަނަށްވުރެ ގިނަ ރުފިޔާ އެފަރާތަށް ހަމަޖައްސާފައިވާ ކަމަށްވެސް ބުންޏެވެ.

މިއާއެކު އާސަންދައިން ބުނީ، ގާތްގަނޑަކަށް 5 މަސްދުވަހުގެ މުއްދަތަށްފަހު، ބަލިމީހާގެ ހާލަތަށް ބަދަލެއް އައިސްފައި ނުވާތީ، އިތުރު ސަޕޯޓިވް ކެއަރ ރާއްޖޭގައި ކުރިއަށް ގެންދިއުމަށް ވެންޓލޭޓަރ ގޭޓާއެކު ބަލިމީހާ އަނބުރާ ގެނައުމަށް 14 އޮގަސްޓު 2024 ގައި އާއިލާއާ ވާހަކަ ދައްކާފައިވާ ކަމަށެވެ.

އަދި ރާއްޖޭގައި އަލްޓަނޭޓިވް ރިހެބިލިޓޭޝަން އޮޕްޝަން ހުރިކަމާއި ރާއްޖެއިން ބޭރުން ދިގު މުއްދަތަކަށް ރިހެބިލިޓޭޝަން ދިނުމަކީ އާސަންދަ ސްކީމުގެ ދަށުން ކަވަރު ނުކުރާ ކަމެއްކަން އާއިލާއަށް ކިޔައިދިން ކަމަށާ ރާއްޖޭގައި ކުރިއަށް ގެންދެވޭނެ ފަރުވާގެ ޕްލޭނަކާއެކު 3 ދުވަހުގެ ތެރޭގައި ބަލިމީހާ އަނބުރާ ރާއްޖެއަށް ބަދަލުކުރުމާ ވެސް އާއިލާއާ ވާހަކަދެކެވިފައިވާ ކަމަށް އާސަންދައިން ވަނީ ފާހަގަކޮށްފައެވެ.

”18 އޮގަސްޓް 2024ގެ ނިޔަލަށް ހޮސްޕޓަލުގެ ފަރުވާއަށް ހިނގާފައިވާ ޚަރަދު ތަކުގެ ފައިނަލް ބިލު ލިބިފައިވާއިރު ޖުމްލަ އަރާފައިވނީ 89,339.91 އެމެރިކާ ޑޮލަރެވެ. އާސަންދަ ސްކީމުގެ ދަށުން ކަވަރު ނުކުރާ ޗާޖުތައް އުނިކުރުމަށްފަހު އާސަންދައިން ވަނީ 85،989.15 ޑޮލަރު ބަލިމީހާގެ ބިލުން ހަމަޖައްސައިދިނުމަށް އެޕްރޫވްކޮށްފައެވެ.“ އާސަންދަގެ ބަޔާން ނިންމާލަމުން ބުނެފައިވެއެވެ.