ހެންވޭރު ގެސްޓް ހައުސް އެއްގެ ތެރެއިން މިދިޔަ ހޯމަ ދުވަހު ޒަހަމްތަކާއެކު ފެނުނު މީހާއާ މާރާމާރީ ހިންގިކަަމުގެ ތުހުމަތުގައި ދެ މީހަކު ހައްޔަރުކޮށްފި އެވެ.

މި މައްސަލައިގައި ހައްޔަރު ކޮށްފައިވަނީ، ކ.ތުލުސްދޫއަށް ނިސްބަތްވާ އުމުރުން 23 އަހަރުގެ ފައުޒާން ޒަރީރު އާއި، މއ.މައްޗަންގޯޅި ވޮށްކޮޅުގެ އަޙްމަދު މާޒިން އިބަރާހިމް (23އ)އެވެ.

މި މައްސަލައިގައި މި ދެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓައް ހާޒިރުކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައިވާކަމަށް ފުލުހުން ބުނެއެވެ.

Advertisement

މި ހާދިސާގައި އަނިޔާ ލިބުނީ 27 އަހަރުގެ ދިވެހި ފިރިހެނަކަށްށެވެ. ފުލުހުން ބުނީ އޭނާގެ ހަބަރެއް ނުވާ ކަމަށް މައުލޫމާތު ލިބިގެން ފުލުހުން އެތަނަށް ގޮސް ބެލިއިރު އޭނާ ފެނިފައިވަނީ ޒަހަމްތަކަކާ އެކު އޮއްވާ ކަމަށެވެ.
އޭނާއަށް މިހާރު ދަނީ އައިޖީއެމްއެޗްގެ އައިސީޔޫގައި ފަރުވާ ދެމުންނެެވެ.

ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.