ނުކުޅެދުންތެރިކަން ހުންނަ މީހަކަށް ޖިންސީ ގޯނާކުރި ތުހުމަތުގައި 57 އަހަރުގެ މީހަކު ހައްޔަރުކޮށްފިއެވެ.

ދެކުނުގެ އަތޮޅެއްގެ ރަށެއްގައި ނުކުޅެދުންތެރިކަން ހުންނަ މީހަކަށް ޖިންސީ ގޯނާކުރި ތުހުމަތުގައި 57 އަހަރުގެ ދިވެހި ފިރިހެނެއް ހައްޔަރުކުރީ މިދިޔަ ބުދަ ދުވަހުއެވެ. މި މީހާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

މި މައްސަލަ ފުލުހުންނަށް ރިޕޯޓްކޮށްފައިވަނީ މިދިޔަ އެޕްރީލް 14 ވަނަ ދުވަހުއެވެ. ޖިންސީ އަނިޔާ ލިބުނު ފަރާތަކީ ނުކުޅެދުންތެރިކަން ހުންނަ މީހަކަށްވާތީ، މި މައްސަލަ ތަޙުޤީޤުކުރަމުން ގެންދަނީ ކުޑަކުއްޖަކަށް ޖިންސީ ގޯނާކުރި މައްސަލައެއްގެ ގޮތުގައެވެ.

Advertisement

މި މައްސަލައިގައި ތުހުމަތުކުރެވޭ 57 އަހަރުގެ ފިރިހެނާ ޝަރީޢަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ. މި މައްސަލައާ ގުޅޭ އިތުރު ތަފްސީލު ފުލުހުން ހާމައެއް ނުކުރައްވައެވެ.

ނުކުޅެދުންތެރިކަން ހުންނަ މީހުންނަށް ކުރާ ޖިންސީ ގޯނާގެ މައްސަލަތަކަކީ ދިވެހިރާއްޖޭގައި ވެސް ކަންބޮޑުވުން އުފެދިފައިވާ މައްސަލައެކެވެ. މިފަދަ މައްސަލަތައް ރިޕޯޓުކުރުމަށް ހިތްވަރު ދިނުމަށާއި، އަނިޔާ ލިބޭ ފަރާތްތަކަށް އެހީތެރިކަން ފޯރުކޮށްދިނުމަށް ސަރުކާރުންނާއި އަމިއްލަ ޖަމްޢިއްޔާތަކުން މަސައްކަތްތަކެއް ކުރަމުން ގެންދެއެވެ.

2014 ވަނަ އަހަރު ފާސްކުރެވުނު ޖިންސީ ކުށުގެ ޤާނޫނުގެ ދަށުން، ނުކުޅެދުންތެރިކަން ހުންނަ މީހަކާމެދު ޖިންސީ ޢަމަލެއް ހިންގުމަކީ ބޮޑު ކުށެއްގެ ގޮތުގައި ކަނޑައަޅާފައިވާ ކަމެކެވެ. މިފަދަ ކުށްތަކަށް ހަރުކަށި އަދަބުތަކެއް ކަނޑައެޅިފައިވެއެވެ.

ނަމަވެސް، މިފަދަ މައްސަލަތައް ރިޕޯޓުކުރުމުގައި ދަތިތަކެއް ހުރިކަން ފާހަގަކުރެވެއެވެ. ޚާއްޞަކޮށް އަތޮޅުތެރޭގައި މިފަދަ މައްސަލަތައް ފޮރުވުމަށް މަސައްކަތްަތްކުރާކަން ވެސް ފާހަގަކުރެވެއެވެ. މިކަމާ ގުޅިގެން ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގުމަށް ސަރުކާރުން ވަނީ އިސްކަމެއް ދީފައެވެ.