ހުޅުމާލެ ފޭސް އެކެއް އަދި ފޭސް ދޭއް ގުޅޭ ބްރިޖްގައި ލޮރީއަކާއި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައިފިއެވެ.

މި އެކްސިޑެންޓްގައި ސައިކަލް ދުއްވަން އިން ޒުވާނާއަށް ވަނީ އެކިވަރުގެ އަނިޔާތައް ލިބިފައެވެ. އެކްސިޑެންޓް ހިނގި ލޮރީއަކީ އެޗްޑީސީން މަގުތަކަށް ފެންޖެހުމަށް ބޭނުންކުރާ އުޅަނދެކެވެ.

މި ކަމާ ގުޅިގެން ފުލުހުން ހިއްސާކުރި މެސެޖެއްގައި ވަނީ ހުޅުމާލޭ ފޭސް އެކަކުން ފޭސް ދެއަކަށް ދަތުރުކުރުމަށް އޮންނަ ބްރިޖުމަތީގައި ލޮރީއަކާއި ސައިކަލެއްޖެހި އެކްސިޑެންޓެއްް ހިނގައިގެން އުޅޭތީ ފުލުހުން ހަރަކާތްތެރިވަމުން އަންނަ ކަމަށެވެ.

Advertisement

ސައިކަލު ދުއްވަން އިން އުމުރުން 24 އަހަރުގެ މީހާއަށް މިހާރު ހުޅުމާާލޭ ހޮސްޕިޓަލުގައި ފަރުވާދެމުންދާ ކަމަށް ފުލުހުން ވިދާޅުވިއެވެ.

މި ފަހަކަށް އައިސް މާލެ ސަރަހައްދުގައި މިފަދަ އެކްސިޑެންޓުތައް ވަނީ ވަރަށް ގިނަވެފައެވެ. ދާދި ފަހުން ވެސް ވަނީ ހުޅުމާލޭގައި ކާރަކާއި ސައިކަލެއްޖެހި އެކްސިޑެންޓުވެ މީހަކު ނިޔާވެފައެވެ.

މިކަމާ ގުޅިގެން ފުލުހުން ވިދާޅުވެފައިވަނީ، މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން މާލެ އާއި ހުޅުމާލޭގެ އެކި ސަރަހައްދުތަކުގައި ވެހިކަލް ޗެކްޕޮއިންޓްތައް ގާއިމުކޮށް އުޅަނދުފަހަރު ބަލައި ފާސްކުރުމުގެ މަސައްކަތް ކުރަމުންދާ ކަމަށެވެ.