ނައިފަރުގައި ހުންނަ ޅ.އަތޮޅު ހޮސްޕިޓަލުގެ ސަރވަރ ހެކްކުރި މައްސަލަ ފުލުހުން ތަޙުޤީޤުކުރަމުން ދާކަމަށް މޯލްޑިވްސް ޕޮލިސް ސަރިވިސް އިން ބުނެފިއެވެ.
އެ އިދާރާއިން މިއަދު ބުނީ ޅ. ނައިފަރުގައި ހުންނަ ހޮސްޕިޓަލުގެ ސަރވަރ ހެކްކުރި މައްސަލަ 12 ސެޕްޓެމްބަރ 2024 ވަނަ ދުވަހު ފުލުހުންނަށް ރިޕޯޓުކޮށްފައިވާ ކަމަށެވެ. މި މައްސަލައިގެ ތަޙުޤީޤު މިހާރު ދަނީ ކުރިއަށް ކަމަށް ވެސް އެފަރާތުން މައުލޫމާތު ދެއްވިއެވެ.
މި މައްސަލައާ ގުޅިގެން މާލެއިން ޚާއްޞަ ތަޙުޤީޤު ޓީމެއް އެ ރަށަށް ފޮނުވާފައިވާ ކަމަށާއި، އަދި މި ޓީމު މިހާރު ދަނީ އެ ރަށުގައި ހަރަކާތްތެރިވަމުން ކަމަށްވެސް ދިވެހި ފުލުހުން ޚިދުމަތުން މައުލޫމާތު ދެއްވިއެވެ.
ފުލުހުންގެ ފަރާތުން މި މައްސަލައާ ގުޅޭ އިތުރު މަޢުލޫމާތު ހާމަކޮށްފައި ނުވި ނަމަވެސް، މި ކަމަކީ ޞިއްޙީ ދާއިރާގެ މުހިންމު މަޢުލޫމާތުތަކެއް ރައްކާކުރެވިފައިވާ ސަރވަރއަކަށް ނުރައްކާތެރި ގޮތެއްގައި ވަދެފައިވާ މައްސަލައެއް ކަމަށް ބެލެވެއެވެ.
މި މައްސަލައިގައި ކުށްވެރިން ހޯދައި، އެ ފަރާތްތަކާމެދު ޤާނޫނީ ފިޔަވަޅު އެޅުމަށް ފުލުހުން މަސައްކަތްކުރަމުންދާއިރު މިފަދަ ސައިބަރ ހަމަލާތައް މަދުންނަމަވެސް ސަރުކާރުގެ ބައެއް އިދާރާތަކަށް ދޭތެރެ ދޭތެރެއިން އަމާޒުވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
