ރާއްޖެއާއި ޗައިނާއާ ދެމެދު ފްރީ ޓްރޭޑް އެގްރިމެންޓް (އެފްޓީއޭ) އަށް ޢަމަލުކުރަން ފެށުމުން އަހަރަކު 1 ބިލިއަން ޑޮލަރުގެ ވިޔަފާރި ކުރެވޭނެ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ. މިހާރު ޗައިނާއާއި ރާއްޖެއާ ދެމެދު 700 މިލިއަން ޑޮލަރުގެ ވިޔަފާރި ކުރެވޭ ކަމަށް ހީނާ ވިދާޅުވިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހީނާ ވިދާޅުވި ގޮތުގައި އެފްޓީއޭގެ ސަބަބުން ޑޮލަރުގެ ބަދަލުގައި ދިވެހި ރުފިޔާއިން ގިނަ ކަންތައްތަކެއް ކުރެވޭނެއެވެ. އަދި ޗައިނާއަކީ ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ޤައުމުކަން ފާހަގަކުރެއްވިއެވެ.
"ދިވެހިރާއްޖެއާއި ޗައިނާއާ އެކީގައި މިހާރު ހަދާފައިވާ އެފްޓީއޭ އެއްބަސްވުމުގައިވާ ގޮތުގެ މަތިން އެފްޓީއޭއަށް އަމަލު ކުރަން ފެށުމާ ގުޅިގެން އެއް ބިލިއަން ޑޮލަރަށް މި ވިޔަފާރީގެ އަދަދު މަތިވެގެންދޭ"
ހީނާ ވިދާޅުވިއެވެ.
މި ދެ ޤައުމުގެ ދެމެދުގައި އިޤްތިޞާދީ ގުޅުން ބަދަހިކުރުމުގެ ގޮތުން އިތުރު ފިޔަވަޅުތަކެއް އަޅައިފައިވާއިރު، ދިވެހި ސަރުކާރާއި ޗައިނާގެ ޕީޕަލްސް ބޭންކާ ދެމެދު ކަރަންސީ އެކައުންޓު މުޢާމަލާތްތަކުގެ އެއްބަސްވުމެއްގައި ސޮއިކޮށްފައިވެއެވެ.
މީގެ އިތުރުން، އިންޑިއާއިން ރާއްޖެއާއެކު ފްރީ ޓްރޭޑް އެގްރިމެންޓެއް ހަދަން ހުށަހަޅާފައިވާކަމަށް އިކޮނޮމިކް މިނިސްޓަރު ކުރިން ވިދާޅުވެފައިވާކަން ފާހަގަކުރެވެއެވެ. މިކަމުން ދޭހަވަނީ ރާއްޖޭގެ އިޤްތިޞާދީ ގުޅުންތައް އިތުރަށް ފުޅާވަމުންދާކަމެވެ.
Advertisement
This content is created and paid for by advertisers and does not involve Voice Journalists
