ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގެ "ޕޮކެޓް ޕާކިން" ޒޯނުތަކުން ޕާކު ކުރާނެ ޖާގައަށް އެދުމުގެ ފުރުސަތު އާންމުންނަށް ހުޅުވާލައިފިއެވެ. މި ގޮތުން 8 ޕާކިން ޒޯނަކުން ޖުމްލަ 1،374 ޕާކިން ޖާގަ ކުއްޔަށް ދިނުމަށް ވަނީ ހަމަޖެހިފައެވެ.

އެޗްޑީސީން ބުނެފައިވާ ގޮތުގައި މި ޕާކިން ޖާގަތައް އެއް އަހަރުގެ މުއްދަތަށް ކުއްޔަށް ދޫކުރާނީ މަހަކު 2،000 ރުފިޔާއަށެވެ. ޕާކިން ޖާގަ ކުއްޔަށް ހިފާނެ ފަރާތްތައް ކަނޑައަޅާނީ ގުރުއަތުލައިގެންނެވެ.

ފޯމު ހުށަހެޅުމުގެ މުއްދަތު މިހާރު ވަނީ ހުޅުވާލާފައެވެ. މި މުއްދަތު ނިމޭނީ އަންނަ އޮކްޓޫބަރު މަހުގެ 1 ވަނަ ދުވަހުއެވެ. ފޯމު ބަލައިގަންނާނީ ރަސްމީ ދުވަސްތަކުގެ ހެނދުނު 9:00 އިން މެންދުރުފަހު 2:00 އަށް އެޗްޑީސީގެ ރިސެޕްޝަނުންނެވެ.

އެޗްޑީސީން އިތުރަށް ބުނެފައިވާ ގޮތުގައި ގުރުއަތުލުން އޮންނާނީ ސެންޓްރޯ މޯލްގެ ގްރައުންޑް ފްލޯގައެވެ. ގުރުއަތުލާނެ ތާރީޚެއް ފަހުން އިޢުލާންކުރާނެ ކަމަށްވެސް ބުނެފައިވެއެވެ.

އިތުރު މަޢުލޫމާތު ސާފުކުރަން ބޭނުންވާ ފަރާތްތަކަށް އެޗްޑީސީގެ 1516 ނަންބަރަށް ގުޅުމަށް އަންގާފައިވެއެވެ. އަދި މި ކަމާ ގުޅޭ އިތުރު މަޢުލޫމާތު އެޗްޑީސީގެ ވެބްސައިޓުގައި ޝާއިޢުކޮށްފައިވާނެ ކަމަށްވެސް ބުނެފައިވެއެވެ.