ހުޅުމާލޭގައި އަމިއްލަ ފަރާތްތަކުން ތަރައްޤީކުރާ ރެސިޑެންޝަލް އިމާރާތްތަކުން އެޕާޓްމަންޓް ގަތުމުގައި ފައިސާގެ މުޢާމަލާތްތަކަށް ސަމާލުވުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިލްތިމާސްކޮށްފިއެވެ.

އެޗްޑީސީން ނެރުނު އިޢުލާނުގައި ބަޔާންކޮށްފައިވާ ގޮތުގައި، އެޕާޓްމަންޓްތައް ވިއްކުމުގެ މުޢާމަލާތްތައް ކުރިއަށްދާނީ މަޝްރޫޢު ހިންގާ ފަރާތާއި ގަންނަ ފަރާތާ ދެމެދު އެއްބަސްވާ ގޮތަކަށެވެ. ނަމަވެސް، ފައިސާގެ މުޢާމަލާތްތައް ކުރަންވާނީ އިމާރާތްކުރާ ފަރާތާއި އެޗްޑީސީއާ ދެމެދު ވެފައިވާ އެއްބަސްވުމާ އެއްގޮތަށް ކަމަށް އެ ކުންފުނިން ބުނެފައިވެއެވެ.

އެޗްޑީސީން ފާހަގަކޮށްފައިވާ މުހިންމު ނުކުތާތަކުގެ ތެރޭގައި، އެޕާޓްމަންޓް ވިއްކަން ފެށުމުގެ ކުރިން ގިނަވެގެން 50,000 ރުފިޔާގެ ރީފަންޑަބަލް ބުކިން ފީއެއް ނެގިދާނެ ކަމަށާއި، އެޕާޓްމަންޓް ވިއްކަން ހުޅުވާލެވޭނީ އިމާރާތުގެ 20% ނިންމުމަށްފަހު އެޗްޑީސީގެ ހުއްދައާއެކު ކަމަށް ބަޔާންކޮށްފައިވެއެވެ.

މީގެ އިތުރުން، އަސޭރިޔާ ޕްރޮޖެކްޓަށް 950,000 ރުފިޔާގެ ރީފަންޑަބަލް ބުކިން ފީއެއް ނެގުމުގެ ހުއްދަ ދީފައިވާ ކަމަށާއި، ބައެއް މަޝްރޫޢުތަކުގައި އިމާރާތުގެ 20% ނުނިމުނު ނަމަވެސް، އެޗްޑީސީއާއި ޑިވެލޮޕަރާ ދެމެދު އުފައްދާފައިވާ އެސްކްރޯ އެކައުންޓަށް ފައިސާ ޖަމާކޮށްގެން އެޕާޓްމަންޓް ގަނެވިދާނެ ކަމަށްވެސް އެޗްޑީސީން ބުނެފައިވެއެވެ.

އެޗްޑީސީން އާންމުންނަށް އިލްތިމާސްކޮށްފައިވަނީ ރެސިޑެންޝަލް އިމާރާތްތަކުން އެޕާޓްމަންޓް ގަތުމަށް ޝައުގުވެރިވާ ފަރާތްތަކުން، ފައިސާގެ މުޢާމަލާތް ކުރުމުގެ ކުރިން މި ކަންކަމަށް ސަމާލުވުމަށެވެ. މިއީ އެޕާޓްމަންޓް ގަންނަ ފަރާތްތަކުގެ ޙައްޤުތައް ރައްކާތެރިކުރުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ.