ގެއެއްގެ ހަވަނަ ފަންގިފިލާއިން ބިއްލޫރިގަނޑެއް މަގުމައްޗަށް ވެއްޓި މީހަކަށް އަނިޔާވެގެން ފަރުވާދެމުންދާ ކަމަށް ފުލުހުން ހާމަކޮށްފިއެވެ.
ފުލުހުން ވިދާޅުވީ މާފަންނު، ޖަހާމުގުރި ގޯޅީގައި ހުރި ގެއެއްގެ ހަވަނަ ފަންގިފިލާގެ ދޮރެއްގެ ބިއްލޫރިގަނޑެއް މަގުމައްޗަށް ވެއްޓިފައިވާކަމަށް މިރޭ 19:12 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
މި ހާދިސާގައި، ބިއްލޫރިގަނޑު ވެއްޓި އެ ސަރަހައްދުގައި ސައިކަލެއްގައި އިން މީހަކަށް ވަނީ އަނިޔާވެފައެވެ. ބިއްލޫރިގަނޑު ތަޅައިގެން ގޮސް އޭގެ ބައިތައް އޭނާގެ ގަޔަށް ޖެހި، އަނިޔާވީ ކަމަށް ފުލުހުން ވިދާޅުވެއެވެ. އަނިޔާވި މީހާއަކީ ދިވެހި ފިރިހެނެކެވެ. އޭނާ މިހާރު ވަނީ އައިޖީއެމްއެޗަށް ގެންގޮސްފައެވެ.
ފުލުހުން ވިދާޅުވީ އަނިޔަވި މިހާ އެވަގުތު އުޅުނީ އެސަރަޙައްދުގައި ސައިކަލް ޕާކްކުރަން ކަމަށާއި، ބިއްލޫރިގަނޑު ވެއްޓުނު ވަގުތާ އެވަގުތާ ދިމާވީ ކަމަށެވެ.
މިހާދިސާއާއި ގުޅިގެން ބަލަންޖެހޭ ކަންކަން ފުލުހުން ގެންދަނީ ބަލަމުން ކަމުގައި ވިދާޅުވިއެވެ.
މިފަދަ ހާދިސާތަކަކީ މާލޭގައި ދިމާވަމުންދާ ނުރައްކާތެރި ހާދިސާތަކެއް ކަމަށްވާއިރު، އިމާރާތްތަކުގެ ސަލާމަތީ ފިޔަވަޅުތައް ހަރުދަނާކުރުމަށް ސަމާލުކަން ދޭންޖެހޭ ކަމަށް ގިނަ ފަރާތްތަކުން ފާހަގަކުރަމުންދެއެވެ.
Advertisement
This content is created and paid for by advertisers and does not involve Voice Journalists
