ކ. ހުވަފެންފުށިން ގެއްލުނު ތަސްލީމު ހޯދަން ޔެލޯ ނޯޓިސް ނެރުނީ ރާއްޖެއިން އޭނާ ފުރިކަމަށް ބަލާފައެއް ނޫން ކަމަށް ފުލުހުން ހާމަކޮށްފިއެވެ.

ކ. ހުވަފެންފުށި ދެކުނުން ހިއްކާފައި އޮންނަ ފަސްގަނޑަށް ދަތުރުގޮސް އުޅެނިކޮށް ގެއްލުނު ތަސްލީމް މުޙައްމަދު ހޯދުމަށް އިންޓަޕޯލް ޔެލޯ ނޯޓިސް ނެރުމާ ގުޅޭ އިތުރު މަޢުލޫމާތު ފުލުހުން މިއަދު ހާމަކޮށްފައިވާއިރު، ފުލުހުން ބުނެފައިވަނީ މި ނޯޓިސް ނެރުނީ ތަސްލީމް ރާއްޖެއިން ބޭރަށް ދިޔަކަމަށް ގަބޫލުކުރެވޭތީ ނޫން ކަމަށެވެ.

ތަސްލީމް ގެއްލުނީ މިދިޔަ އޯގަސްޓް 30 ވަނަ ދުވަހުގެ ހެނދުނު 10-11 އާ ދެމެދުގެ ވަގުތެއްގައެވެ. އޭނާ އެ ފަސްގަނޑަށް ދިޔައީ އުފަންދުވަހުގެ ޕާޓީއަކާއި އެންގޭޖްމަންޓް ޕާޓީއަކަށް ބެކްޑްރޮޕް އަދި ލައިޓިންގގެ މަސައްކަތް ކުރުމަށެވެ. މި ދަތުރުގައި 25 މީހުންނާއި ދެ ކުޑަކުދިން ބައިވެރިވިއެވެ.

ފުލުހުން މިހާރު ދަނީ މި މައްސަލައިގެ ޖިނާއީ ތަޙްޤީޤެއް ކުރިއަށް ގެންދަމުންނެވެ. މިގޮތުން ތަސްލީމްގެ ފޯނާއި ލެޕްޓޮޕްގެ ފޮރެންސިކް ތަޙުލީލު ކުރަމުންދާ ކަމަށް ފުލުހުން ބުނެފައިވެއެވެ. އަދި ފުލުހުންގެ އަދި އެމްއެންޑީއެފްގެ ޑައިވިން ޓީމުތަކުން އެ ސަރަޙައްދު ފުޅާ ދާއިރާއެއްގައި ބަލާފައިވާ ކަމަށްވެސް ފުލުހުން މަޢުލޫމާތު ދީފައިވެއެވެ.

ފުލުހުން އިތުރަށް ބުނެފައިވަނީ ތަސްލީމް ރާއްޖެއިން ބޭރަށް ގޮސްފައިވާކަން އެނގިފައިނުވާ ކަމަށެވެ. ނަމަވެސް، އެއްވެސް ފުރުސަތެއް އޮތްތޯ ބެލުމަށް އިންޓަޕޯލް ޔެލޯ ނޯޓިސް ނެރެފައިވާ ކަމަށް ފުލުހުން ވަނީ ހާމަކޮށްފައެވެ.

ތަސްލީމް ހޯދުމުގެ މަސައްކަތް ކުރިއަށްދާއިރު، ފުލުހުން ވަނީ އާންމުންގެ އެހީތެރިކަމަށް އެދިފައެވެ. އަދި މި މައްސަލައާ ގުޅޭ އެއްވެސް މަޢުލޫމާތެއް އެނގޭނަމަ ފުލުހުންނަށް އެންގުމަށް އާންމުންނަށް ގޮވާލާފައިވެއެވެ.