ފަލަސްތީނުގެ ބިންތަކުން އިޒްރޭލު ފައިބަން ގޮވާލައި އދ. އިން ގަރާރެއް ފާސްކޮށްފިއެވެ.

އދ. ގެ އެއްވެސް ގަރާރަކަށް ދުވަހަކުވެސް އަމަލުނުކުރާ އިޒްރޭލަށް އަނެއްކާވެސް ފަލަސްތީނުގެ ބިންތަކުން އެއް އަހަރު ތެރޭގައި ފައިބަން އދ. ގެ އާންމު މަޖިލީހުން ގޮވާލައިފައިވާ ގަރާރު ފާސްވެފައިވަނީ 124 ގައުމެއްގެ ތާއީދާއެކުއެވެ.

އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ވަނީ އިޒްރޭލުން 1967 އިން ފެށިގެން ފަލަސްތީނުގެ ބިންތަކުގައި ވަޒަންވެރިވެ އުޅެނީ ބައިނަލްއަޤްވާމީ ޤާނޫނުތަކާ ޚިލާފަށް ކަމަށް ނިންމާފައެވެ. ނަމަވެސް އިޒްރޭލުގެ ބަންޔަމިން ނަތަންޔާހޫ ބުނެފައިވަނީ އައިސީޖޭ އަދި އދ. ގެ ނިންމުންތަކަށް އިޒްރޭލުން ތަބާނުވާނެ ކަމަށެވެ.

Advertisement

2024 އޮކްޓޯބަރު 7 އިން ފެށިގެން ޣައްޒާގައި އިސްރާއީލުން ދެމުންދާ ހަމަލާތަކުގައި މިހާތަނަށް 41,452 މީހުން މަރުވެފައިވާއިރު، އޭގެތެރޭގައި 17,000 އަށްވުރެ ގިނަ ކުޑަކުދިން ހިމެނެއެވެ. މި ހަމަލާތަކުގައި އެމެރިކާއާއި ޔޫރަޕުގެ ގައުމުތަކުން އިޒްރޭލަށް އެހީތެރިވަމުންދާކަން ފާހަގަކުރެވެއެވެ.

ޣައްޒާގެ މަދަނީ އަމާޒުތަކަށް އިޒްރޭލުން ހަމަލާދެމުންދާއިރު، އާންމު ރައްޔިތުންނަށް ފެން، ކާނާ އަދި ބޭސްފަރުވާގެ ދަތިކަން ވަނީ ކުރިމަތިވެފައެވެ. އަދި ބައިނަލްއަޤްވާމީ ޤާނޫނުތަކާ ޚިލާފަށް ހުޅަނގު އައްސޭރީގައި ޔަހޫދީން ވަޒަންވެރިކުރުވުމުގެ މަސައްކަތް ވެސް އިޒްރޭލުން ކުރިއަށް ގެންދާކަން ފާހަގަކުރެވެއެވެ.

މި ހާލަތުގައި، ބައިނަލްއަޤްވާމީ މުޖުތަމަޢުން އިޒްރޭލުގެ މައްޗަށް އިތުރު ފިޔަވަޅުތަކެއް އަޅަން ޖެހޭކަމަށް ގިނަ ފަރާތްތަކުން ގޮވާލަމުންދެއެވެ. ނަމަވެސް، އިޒްރޭލުގެ ޢަމަލުތައް ހުއްޓުވުމަށް އެޅޭނެ ހަރުދަނާ ފިޔަވަޅުތަކެއް މިހާތަނަށް ފެންނާކަށް ނެތެވެ.