ދެކުނު ބެއިރޫތަށް އިސްރާއީލުން ދިން ވައިގެ ހަމަލާގައި މަރުވި މީހުންގެ އަދަދު 14 އަށް އަރައިފާވާއިރު، 66 މީހުން ޒަޚަމްވެއްޖެކަމަށް ލިބަނޯނުގެ ސިއްޙީ ވުޒާރާއިން ބުނެފިއެވެ. މި ހަމަލާގައި ޒަޚަމްވި މީހުންގެ ތެރެއިން 9 މީހުންގެ ހާލަތު ނުރައްކާތެރިކަމަށް ވުޒާރާއިން މަޢުލޫމާތު ދީފައިވެއެވެ.

ރަސްމީ ލިބަނީސް ނޭޝަނަލް ނިއުސް އެޖެންސީން ބުނާގޮތުގައި ހަމަލާ އަމާޒުވެފައިވަނީ ދެކުނު ސަރަޙައްދުގެ ޖަމޫސް އަވަށުގައި ހުރި ޢާއްމުން ދިރިއުޅޭ އިމާރާތެއްގެ އެޕާޓްމަންޓަކަށެވެ. ހަމަލާ ދިނުމާއެކު އެމްބިއުލާންސްތަކާއި ސިވިލް ޑިފެންސްގެ ޓީމްތައް ސަރަޙައްދަށް އަވަސްވެގަނެ، ޒަޚަމްވި މީހުން ހޮސްޕިޓަލަށް ގެންދެވުނެވެ.

އިސްރާއީލުގެ އިސް އޮފިޝަލެއް ބުނާގޮތުގައި މި ހަމަލާގެ އަމާޒަކީ ޙިޒްބުﷲގެ އިސް ސިފައިންގެ ކޮމާންޑަރެއް ކަމަށްވާ އިބްރާހީމް އަޤީލްއެވެ. އަދި އިސްރާއީލުގެ ހަނގުރާމަވެރި ބާރުތަކުން ބުނެފައިވަނީ އަޤީލްގެ އިތުރުން ޙިޒްބުﷲގެ ހާއްސަ ރިޟްވާން ބާރުގެ އިސް ކޮމާންޑަރުންތަކެއް މި ހަމަލާގައި މަރާލެވުނު ކަމަށެވެ.

ލުބުނާނުގެ ބޮޑުވަޒީރު ނަޖީބް މިކާތީ ބުނެފައިވަނީ މި ހަމަލާއިން އަނެއްކާވެސް ސާބިތުވަނީ އިސްރާއީލުގެ ޢަދުއްވުން އިންސާނީ، ޤާނޫނީ އަދި އަޚްލާޤީ އެއްވެސް މިންގަނޑެއް ނުބަލާކަމެވެ. އަދި އިސްރާއީލުން މިހާރު ކުރަމުންދަނީ ނަސްލު ނައްތާލުމުގެ ޢަމަލެއް ކަމެވެ.

މި ހަމަލާ ދީފައި މިވަނީ އިސްރާއީލުން ޣައްޒާ އަށް ދެމުންދާ އަނިޔާވެރި ހަމަލާތައް އިތުރުވެފައިވާ ދަނޑިވަޅެއްގައެވެ. ޣައްޒާގައި އިސްރާއީލުން ފަށާފައިވާ ގަތުލުއާންމުގައި މިހާތަނަށް ގާތްގަނޑަކަށް 41,300 މީހުން ވަނީ މަރުވެފައެވެ.