ކުދި ޖަޒީރާ ގައުމުތަކުގެ އިގްތިޞާދު ސިންދަފާތުކުރުމަށް މާލީ އެހީ ބޭނުންވާކަމަށް ރައީސް ޑރ.މުޢިއްޒު ވިދާޅުވެއްޖެއެވެ.
އދގެ އާންމު މަޖިލީހުގެ ބައްދަލުވުމުގެ ކުރިން ބޭއްވުނު "ސަމިޓް އޮފް ދަ ފިއުޗަރ" ގެ ތެރެއިން ކުރިއަށްގެންދެވުނު ސިޑްސްގެ ބައްދަލުވުމުގައި މިރޭ ތަޤުރީރުކުރައްވަމުން ރައީސް ޑރ.މުޢިއްޒު ވިދާޅޫވީ ކުދި ގައުމުތައް ދެމިއޮންނާނީ އިގްތިޞާދު ސިންދަފާތު ކުރެވިގެންކަމަށާއި، އެކަމަކު އެކަން ކުރެވޭނީ މާލީ އެހީތެރިކަން ލިބިގެން ކަމަށެވެ.
ކުދި ޖަޒީރާ ގައުމުތަކުގެ ދަރަނި ދެއްކުމަށް ދެމެހެއްޓެނިވި ހައްލުތަކެއް ހޯދައިދިނުމަށް ވެސް ރައީސުލްޖުމްހޫރިއްޔާ ގޮވާލެއްވިއެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، ސިޑްސް ގައުމުތަކުގެ އިޤްތިޞާދުތައް ބަރޯސާވެފައިވަނީ މަދު ސިނާއަތްތަކެއްގެ މައްޗަށެވެ. އެހެންކަމުން، އިޤްތިޞާދު ސިންދަފާތުކުރުމަކީ ހަމައެކަނި ހާސިލުކުރަން އޮތް އަމާޒެއް ނޫން ކަމަށް އެމަނިކުފާނު ވިދާޅުވިއެވެ. އަދި އެއީ ސިޑްސް ގައުމުތަކުގެ ދެމިއޮތުމަށް ކޮންމެހެން ކުރަންޖެހޭ ކަމެއް ކަމަށް އެމަނިކުފާނު ވިދާޅުވިއެވެ. މި މަޤްޞަދު ހާސިލުކުރެވޭނީ ގައުމުތަކުގެ އުފެއްދުންތެރިކަން އިތުރުކޮށްގެން ކަމަށް ރައީސުލްޖުމްހޫރިއްޔާ ފާހަގަކުރެއްވިއެވެ.
ކުދި ޖަޒީރާ ގައުމުތަކަށް މިހާރު ކުރިމަތިވެފައިވާ މާލީ ބުރަތައް ލުއިކޮށްދިނުމަށް މަސައްކަތްކުރަންޖެހޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސް މިރޭ ތަޤުރީރު ކުރެއްވި ބައްދަލުވުމަކީ ސިޑްސް ގައުމުތަކުގެ މާލީ ހާލަތާއި، އެކަމުގައި ކުރެވިދާނެ ކަންކަމާމެދު މަޝްވަރާކުރުމަށް ބޭއްވުނު ބައްދަލުވުމެކެވެ.
އދގެ އާންމު މަޖިލީހުގައި ރައީސް ޑރ.މުޢިއްޒު ތަގުރީރުކުރައްވާނީ އަންގާރަ ދުވަހުއެވެ.
Advertisement
This content is created and paid for by advertisers and does not involve Voice Journalists
