ޓެކްނޮލޮޖީގެ ބޮޑެތި ކުންފުނިތަކުން އެމީހުންގެ ސޯޝަލް މީޑިއާ ޕްލެޓްފޯމްތައް ކުށުގެ ވެށިތަކަކަށް ނުހެދުމަށް ޑެންމާކުން އިލްތިމާސްކޮށްފިއެވެ. 

ސޯޝަލް މީޑިއާ ޕްލެޓްފޯމްތައް ޖަރީމާ ހިންގާ ފަރާތްތަކުގެ މާލަންތަކަކަށް ވިޔަ ނުދިނުމަށް، އެ ޕްލެޓްފޯމްތަކުގެ ވެރިންގެ ޒިންމާ އަދާކުރުމަށް ޑެންމާކުން ގޮވާލައިފައިވަނީ ނޯޑިކް ގައުމުތަކުގެ ވަޒީރުންނާއި ގޫގުލް، މެޓާ، ސްނެޕްޗެޓް އަދި ޓިކްޓޮކްގެ ބޮޑެތި ވެރިންނާ ދެމެދު ސްވީޑަންގެ އަޕްސަލާ ސިޓީގައި ބޭއްވުމަށް ހަމަޖެހިފައިވާ މުހިންމު ބައްދަލުވުމަކާ ދިމާކޮށެވެ.

"އަޅުގަނޑުމެން ނޯޑިކް ވަޒީރުން އެއްބަސްވަނީ މި މައްސަލަ ޙައްލުކުރުމަށް އެކުގައި މަސައްކަތްކުރަން ޖެހޭކަމަށެވެ. އޭގެ ތެރޭގައި ޓެކް ޖަޔަންޓުން އެމީހުންގެ ޒިންމާ އަދާކުރުމަށް ސަމާލުވުން ހިމެނެއެވެ. އެއީ އެމީހުންގެ ޕްލެޓްފޯމްތައް ނުރައްކާތެރި ކުށްތައް ހިންގުމަށް ބޭނުންކުރާ ތަންތަނަށް ނުހެދުމަށްޓަކައެވެ." ޑެންމާކުގެ އަދުލު އިންސާފުގެ ވަޒީރު ޕީޓަރ ހަމްމެލްގާޑް ވިދާޅުވިއެވެ.

ވަޒީރު ކަންބޮޑުވުން ފާޅުކުރެއްވީ ގޭންގުތަކުން ސޯޝަލް މީޑިއާ އަދި އެންކްރިޕްޓް ކުރެވިފައިވާ މެސެޖިން ޚިދުމަތްތައް ބޭނުންކޮށްގެން ނުރައްކާތެރި ޖަރީމާތައް ރާވައި، ވަރަށް ޅަ ކުދިން އެކަންކަމަށް ރެކްރޫޓްކުރަމުންދާކަމުގެ ރިޕޯޓުތަކާ ގުޅޭގޮތުންނެވެ.

"ބައެއް ޕްލެޓްފޯމްތަކުގައި އަޅުގަނޑުމެންގެ ކުޑަކުދިންނާއި ޒުވާނުންނަށް އަނިޔާވެރިކަމާއި މާރާމާރީ ހިންގުމަކީ ހަމައެކަނި ވަޒީފާގެ ފުރުސަތެއްގެ ގޮތުގައި ފެންނަނީ،" އޭނާ ވިދާޅުވިއެވެ.

އޯގަސްޓް މަހު ޑެންމާކުގެ ފުލުހުންގެ އޮފިޝަލެއް ކަމަށްވާ ޓޯބެން ސްވަރާ ހާމަކުރެއްވި ގޮތުގައި، ސްވީޑަންގެ ޒުވާނުން ޑެންމާކުގައި ނުރައްކާތެރި ޖަރީމާތައް ހިންގުމަށް ބޮޑެތި އަދަދުތަކުން ފައިސާ ދީގެން ގެންގުޅޭ މައްސަލަތައް ފުލުހުންނަށް ފެނިފައިވެއެވެ.

"ކުށްވެރިން ސޯޝަލް މީޑިއާގައި ނުރައްކާތެރި ޖަރީމާތައް ހިންގަން ބޭނުންވާ މީހުން ހޯދަމުންދާކަން އަޅުގަނޑުމެންނަށް ފެނިފައިވެއެވެ. އަދި ހިތާމައަކީ ސްވީޑަންގެ ޒުވާނުން ފައިސާ ދިނުމުން އެކަން ކުރަން އެއްބަސްވާ ތަން ފެންނަމުންދާކަމެވެ،" އޭނާ ވިދާޅުވިއެވެ.