ބޭންކް އޮފް މޯލްޑިވްސް (ބީއެމްއެލް) އަށް އައު ސީއީއޯއެއް ހޯދުމަށް އިޢުލާންކޮށްފިއެވެ. މި އިޢުލާން ކުރީ ކުރީގެ ސީއީއޯ ކާލް ސްޓުމްކަ މި މަހުގެ 9 ވަނަ ދުވަހު އިސްތިޢުފާ ދެއްވުމާ ގުޅިގެންނެވެ.
ސްޓުމްކަގެ އިސްތިޢުފާ ގުޅިފައިވަނީ ބީއެމްއެލްގެ ރުފިޔާ އެކައުންޓުތަކުން ޑޮލަރުން މުޢާމަލާތްކުރެވޭ މިންވަރު ކަނޑާލި މައްސަލައާއެވެ. މި މައްސަލަ ހޫނުވެ، ބީއެމްއެލްއިން ސަރުކާރާ ދެކޮޅަށް ބަޣާވާތެއް ކުރިކަމަށް ތުހުމަތުކުރެވުނުތާ މާ ގިނަ ދުވަހެއް ނުވަނީސް އޭނާ އިސްތިޢުފާ ދެއްވިއެވެ.
ބޭންކުން މިއަދު ހަވީރު ކުރި އިޢުލާނުގައި ބަޔާންކޮށްފައިވާ ގޮތުން، ސީއީއޯ މަޤާމަށް ކުރިމަތިލުމުގެ ފުރުޞަތު އަންނަ މަހުގެ 7 ވަނަ ދުވަހާ ހަމައަށް ހުޅުވާލާފައިވެއެވެ. މި މަޤާމުގެ ޝަރުތުތަކުގެ ތެރޭގައި ބޭންކިންގ ނުވަތަ ފައިނޭންސް ދާއިރާއިން މާސްޓަރސް ޑިގްރީއަކާއި 15 އަހަރުގެ ތަޖުރިބާ ހިމެނެއެވެ.
ސައުތު އެފްރިކާއަށް ނިސްބަތްވެވަޑައިގަންނަވާ ކާލް ސްޓުމްކަ ބީއެމްއެލްގެ ސީއީއޯކަމަށް އައްޔަންކުރެވުނީ 2022 ވަނަ އަހަރުއެވެ. އޭނާގެ އިސްތިޢުފާއާ ގުޅިގެން މިހާރު ބީއެމްއެލްއިން ދަނީ އައު ސީއީއޯއެއް ހޯދުމުގެ މަސައްކަތް ކުރަމުންނެވެ.
Advertisement
This content is created and paid for by advertisers and does not involve Voice Journalists
