މޫސުމާބެހޭ އިދާރާ (މެޓް)އިން މިއަދު އަންގާފައިވާ ގޮތުގައި އުތުރާއި މެދުރާއްޖޭގެ އަތޮޅުތަކަށް މިރޭ ކަނޑު ގަދަވާނެކަމަށް ލަފާކުރެވެއެވެ. މާދަމާ ހެނދުނު 06:00 ގެ ނިޔަލަށް، އުތުރުގެ އަތޮޅުތަކަށް ކެރީގެ އަސަރުކުރުމާއެކު ގުގުރުން އެކަށީގެންވާ ކަމަށް މެޓުން ބުނެފައިވެއެވެ. އަދި މެދުރާއްޖެތެރެއާއި ދެކުނުގެ އެކި ހިސާބުތަކަށްވެސް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށް އެ އިދާރާއިން ހާމަކޮށްފައިވެއެވެ.

މެޓުން ދީފައިވާ މަޢުލޫމާތުގައިވާ ގޮތުން، ދެކުނުގެ އަތޮޅުތަކަށް ގަޑިއަކު 8-18 މޭލުގެ ބާރުމިނުގައި ވައިޖެހޭނެކަމަށް ލަފާކުރެވޭއިރު، މެދުރާއްޖެތެރެއާއި އުތުރުގެ އަތޮޅުތަކަށް ގަޑިއަކު 13-20 މޭލުގެ ބާރުމިނުގައި ވައިޖެހޭނެކަމަށް ލަފާކުރެވެއެވެ. މީގެ އިތުރުން، ވިލާގަނޑުގައި ގަޑިއަކު 40 މޭލަށް ވައިގަދަވުން އެކަށީގެންވާ ކަމަށްވެސް މެޓުން ވަނީ އަންގާފައެވެ.

ރާޅުގެ އުސްމިނާ ގުޅޭގޮތުން މެޓުން ހާމަކޮށްފައިވަނީ، 4-7 ފޫޓާ ދެމެދުގައި ހުންނާނެކަމަށް އަންދާޒާކުރެވޭ ކަމަށެވެ. މި ހާލަތާ ގުޅިގެން ކަނޑު ދަތުރުކުރާ ފަރާތްތަކުން ސަމާލުވުމަށް މެޓުން ވަނީ އިންޒާރު ދީފައެވެ.

މީގެއިތުރުން، އިއްޔެ އެންމެ ބޯކޮށް ވާރޭވެހުނު ރަށްތަކުގެ ތަފާސްހިސާބުވެސް މެޓުން ވަނީ ހާމަކޮށްފައެވެ. އެގޮތުން، އެންމެ ބޯކޮށް ވާރޭވެހުނީ ވ. ރަކީދޫއަށް ކަމަށާއި، އެރަށަށް 34.7 މިލިމީޓަރުގެ ވާރޭ ވެހުނު ކަމަށް މެޓުން ބުނެފައިވެއެވެ. ދެވަނައަށް އެންމެ ގިނައިން ވާރޭވެހުނީ ހުޅުލެއަށް ކަމަށާއި، އެރަށަށް 33.3 މިލިމީޓަރުގެ ވާރޭ ވެހުނު ކަމަށް ވެއެވެ. އަދި ތިންވަނައަށް އެންމެ ގިނައިން ވާރޭވެހުނީ ރ. އަލިފުށްޓަށް ކަމަށާއި، އެރަށަށް 19 މިލިމީޓަރުގެ ވާރޭ ވެހުނު ކަމަށް މެޓުން ވަނީ ހާމަކޮށްފައެވެ.