ނޭޕާލްގެ އެލޮފްޓް ކަތަމަންޑޫގައި ބޭއްވުނު ސައުތު އޭޝިއަން ޓްރެވަލް އެވޯޑްސް (ސާޓާ) 2024 ގައި ދިވެހިރާއްޖެއިން 30 އެވޯޑެއް ހާސިލުކޮށް، ދުނިޔޭގެ ފަތުރުވެރިކަމުގެ މައިދާނުގައި އެންމެ ފާހަގަކޮށްލެވޭ އެއް މަންޒިލެއްގެ މަގާމު އަނެއްކާވެސް ދިފާއު ކޮށްފިއެވެ. މީގެ ތެރޭގައި 15 ސާޓާ ގޯލްޑް އެވޯޑާއި 14 ސާޓާ ސިލްވަރ އެވޯޑް ހިމެނެއެވެ.

ޚާއްޞަކޮށް ފާހަގަކޮށްލެވެނީ، ވިޒިޓާސް ޗޮއިސް އެވޯޑްސްގެ ލީޑިންގ ބީޗް ޑެސްޓިނޭޝަންގެ މަގާމު ރާއްޖެއިން އަނެއްކާވެސް ކާމިޔާބުކުރުމެވެ. މިއީ 2016، 2017 އަދި 2023 ވަނަ އަހަރުތަކުގައިވެސް ރާއްޖެއަށް ލިބިފައިވާ ޝަރަފެކެވެ.

މި ހަރަކާތުގެ ތެރޭގައި "ރީޖަނަލް ޓޫރިޒަމް އިން ސައުތު އޭޝިއާ – ޗެލެންޖްސް އެންޑް ކަނެކްޓިވިޓީ" ގެ ނަމުގައި ޕެނަލް ޑިސްކަޝަނެއް ބޭއްވުނެވެ. މި ޕެނަލްގައި ރާއްޖެ ތަމްސީލުކުރެއްވީ އެމްއެމްޕީއާރުސީގެ ސީއީއޯ އިބްރާހީމް ޝިއުރީއެވެ. ޝިއުރީ ވާހަކަފުޅުގައި ފާހަގަކުރެއްވި ގޮތުގައި ރާއްޖެއަކީ ދެކުނު އޭޝިއާގެ ފަތުރުވެރިންނަށް ކުރު ރާސްތާގެ މަންޒިލެއްގެ ގޮތުގައި ވަރަށް އެކަށީގެންވާ ތަނެކެވެ.

ރާއްޖޭގެ ރީތި ސާފު ގޮނޑުދޮށްތަކާއި، އުޖާލާ ފަޅުތަކާއި، ހިތްގައިމު ކަނޑުއަޑީގެ މަންޒަރުތަކަކީ ފަތުރުވެރިން ޝައުޤުވެރިވާ ޤުދުރަތީ އަޖައިބުތަކެވެ. މި ސިފަތަކުގެ ސަބަބުން ރާއްޖެއަކީ ދެކުނު އޭޝިއާގެ ޤައުމުތަކުގެ ކުރު ރާސްތާގެ ފަތުރުވެރިންނަށް ވަރަށް އެކަށީގެންވާ މަންޒިލެކެވެ.

2016 ވަނަ އަހަރުން ފެށިގެން ކޮންމެ އަހަރަކު ބާއްވަމުން އަންނަ ސާޓާގައި، ސައުތު އޭޝިއާގެ ހޮސްޕިޓާލިޓީ އަދި ޓްރެވަލް އިންޑަސްޓްރީގެ ފާހަގަކޮށްލެވޭ ބައިވެރިން ފާހަގަކުރެވެއެވެ.

ސާޓާ 2024 ގައި ރާއްޖެއިން ހޯދި މި ބޮޑު ކާމިޔާބީތަކުގެ ސަބަބުން، ހޮސްޕިޓާލިޓީ އާއި ފަތުރުވެރިކަމުގެ ދާއިރާއިން މަތީ މިންގަނޑުތަކެއް ދަމަހައްޓައި، ދެކުނު އޭޝިއާގެ އެންމެ ނަގާކިޔާލެވޭ މަންޒިލެއްގެ ގޮތުގައި ރާއްޖޭގެ ދަރަޖަ އިތުރަށް ހަރުދަނާވެގެން ދިޔައެވެ.