ވެލާނާ އިންޓަނޭޝަނަލް އެއާޕޯޓުގެ ލީލީ ލައުންޖަށް ސައުތު އޭޝިއަން ޓްރެވަލް އެވޯޑްސް (ސާޓާ) ގެ "ލީޑިންގ އެއާޕޯޓް ލައުންޖް" ގެ މަޤާމު ލިބިއްޖެއެވެ.

މި އެވޯޑް ދެވުނީ ނޭޕާލްގައި ބޭއްވުނު ސާޓާ އެވޯޑްސް 2024 ގެ ރަސްމިއްޔާތުގައެވެ.

އެކްސްގައި ކުރި ޕޯސްޓެއްގައި ވެލާނާ އިންޓަރނޭޝަނަލް އެއާޕޯޓް (ވީއައިއޭއިން) ބުނެފައިވަނީ މި އެވޯޑުން ދޭހަވަގެންދަނީއެ އެއާޕޯޓުން ދަތުރުވެރިންނަށް ފޯރުކޮށްދޭ ހިދުމަތްތައް ބަލައިގަންނަކަމެވެ. އަދި މިކަމާ އެ އެއާޕޯޓުން ފަޚުރުވެރިވާ ކަމަށްވެސް ބުނެފައިވެއެވެ.

Advertisement

ލީލީ ލައުންޖަކީ ވެލާނާ އިންޓަނޭޝަނަލް އެއާޕޯޓުގެ ޕްރީމިއަމް ލައުންޖެވެ. މި ލައުންޖުން ދަތުރުވެރިންނަށް ޒަމާނީ ވަސީލަތްތަކާއެކު ފަސޭހަ އަދި އަރާމު މާހައުލެއް ފޯރުކޮށްދެއެވެ. 

ސާޓާ އެވޯޑްސްއަކީ ދެކުނު އޭޝިއާގެ ޓޫރިޒަމް އަދި ހޮސްޕިޓަލިޓީ ދާއިރާގެ އެންމެ ފާހަގަކޮށްލެވޭ އެވޯޑެވެ.. މި އެވޯޑް ހަފްލާގައި ދެކުނު އޭޝިއާގެ އެކި ޤައުމުތަކުގެ ފަތުރުވެރިކަމުގެ ދާއިރާގެ އެންމެ ފާހަގަކޮށްލެވޭ ވިޔަފާރިތަކަށް އެވޯޑް ދެވެއެވެ.