މެލޭޝިއާއިން ރާއްޖެ އާއިރު ބޮކްސާ ތެރޭ ފޮރުވައިގެން 500 ގްރާމަށް ވުރެ ގިނަ އެކި ބާވަތުގެ މަސްތުވާތަކެތި ގެނައި ކަމަށް ތުހުމަތުވާ މީހާގެ ބަންދުގެ މުއްދަތު އިތުރުކޮށް، ކްރިމިނަލް ކޯޓުން 30 ދުވަސް އިއްޔެ ޖަހައިފިއެވެ.
މި މަހުގެ 16 ވަނަ ދުވަހު މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ވެލާނާ އިންޓަނޭޝަނަލް އެއާޕޯޓުން ހައްޔަރުކުރީ ސ. ހިތަދޫ، ސަމަންދަރު، އަހްމަދު އަހްސަން (35އ) އެވެ.
އޭނާ އެންމެ ފުރަތަމަ ބަންދުކުރީ 5 ދުވަހަށެވެ. އިއްޔެ ވަނީ އަންނަ މަހުގެ 22 ގެ ނިޔަލަށް ކަސްޓޯޑިއަލް ޖަލެއްގައި ބެހެއްޓުމަށް ކްރިމިނަލް ކޯޓުން އަމުރުކޮށް އޭނާގެ ބަންދުގެ މުއްދަތު އިތުރުކޮށްފައެވެ.
ކްރިމިނަލް ކޯޓުން އާއްމުކޮށްފައިވާ ކޯޓު އަމުރުގައި ބުނީ، މަސްތުވާތަކެތި ވިއްކާ، ވިޔަފާރިކުރުމުގެ ތުހުމަތުގައި ހައްޔަރުކުރި އަހުސަނު، ބޮކްސާ ތެރެއަށް ލައިގެން 500 ގްރާމަށްވުރެ ގިނަ އެކި ބާވަތުގެ މަސްތުވާތަކެތި ގެނެސްފައިވާކަން ފުލުހުންނާއި ކަސްޓަމުން ދީފައިވާ ބަޔާނުން އެނގޭ ކަމަށެވެ.
ކަސްޓަމުން އެކްސްގައި ކުރި ޕޯސްޓެއްގައި ބުނެފައިވާ ގޮތުން އަހުސަންގެ އަތުން މަސްތުވާތަކެތީގެ ތެރޭގައި ތިން ބާވަތެއް ފެނިފައިވެ އެވެ. އެއީ 3058 ގުރާމުގެ ހެރޮއިންނާއި، 215 ގްރާމުގެ ސިންތެޓިކް ކެތިނޯންގެ އިތުރުން 315 ގްރާމުގެ މެތަމެފެޓިން އެވެ.
Advertisement
This content is created and paid for by advertisers and does not involve Voice Journalists
