އެންޓި ކޮރަޕްޝަން ކޮމިޝަން (އޭސީސީ)ން ބަލަމުން އަންނަ ކޮރަޕްޝަންތަކުގެ ތަހުގީގުތައް ފަދަ އެކޮމިޝަނުންކުރަމުންދާ މަސައްކަތްތައް އަވަސް ކުރަން ޕްރޮސެކިއުޓާ ޖެނަރަލް އައްބާސް ޝަރީފް މިއަދު އެދިވަޑައިގެންފިއެވެ.
މިކަމަށް ޕީޖީ އެދިވަޑައިގެންނެވީ އޭސީސީގެ ރައީސް އާދަމް ޝާމިލްއާއެކު މިއަދު ބޭއްވެވި ބައްދަލުވުމެއްގައެވެ. މި ބައްދަލުވުމުގައި ޕީޖީ އައްބާސް ޝަރީފް ވަނީ އޭސީސީގެ މަސައްކަތްތަކަށް ޕީޖީ އޮފީހުގެ ފުރިހަމަ އެއްބާރުލުމާއި އެހީތެރިކަން ފޯރުކޮށްދޭނެކަމުގެ ޔަޤީންކަން ދެއްވާފައެވެ.
ޕީޖީ އޮފީހުން ހާމަކުރި ގޮތުގައި، ކޮރަޕްޝަންގެ މައްސަލަތައް ކޯޓުގައި ކާމިޔާބުކުރުމަށްޓަކައި ދެ މުއައްސަސާ އެއް އަމާޒަކަށް މަސައްކަތްކުރުމުގެ މުހިންމުކަން ޕީޖީ އައްބާސް ޝަރީފް ވަނީ ފާހަގަކުރައްވާފައެވެ. އަދި ތަޙުޤީޤުތައް އިތުރަށް ހަރުދަނާކުރުމަށް އިންވެސްޓިގޭޓަރުންނަށް ޕްރޮސިކިއުޓަރުންގެ އިތުރު އެހީތެރިކަން ބޭނުންވާނަމަ އެކަމަށް މަގުފަހިކޮށްދެއްވާނެ ކަމުގެ ޔަޤީންކަންވެސް ދެއްވާފައިވެއެވެ.
މީގެއިތުރުން، މި އަހަރުގެ މިހާތަނަށް އޭސީސީން ތަޙުޤީޤުކޮށް ހުށަހެޅި 5 މައްސަލައެއްގައި ދަޢުވާކުރުމަށް ކޯޓަށް ހުށަހަޅާފައިވާކަމަށް ޕީޖީ އޮފީހުން ބުނެފައިވެއެވެ. އަދި 11 މައްސަލައެއް އޭސީސީން ޕީޖީ އޮފީހުގެ މަޝްވަރާއަށް ހުށަހަޅާފައިވާކަންވެސް ފާހަގަކޮށްފައިވެއެވެ.
މި ބައްދަލުވުމުން ދޭހަވަނީ ދެ މުއައްސަސާ ގުޅިގެން ކޮރަޕްޝަންގެ މައްސަލަތައް ހުއްޓުވުމަށާއި ތަޙުޤީޤުކުރުމަށް އިތުރު ބާރެއް ލައްވަން މަސައްކަތް ފައްޓަވާފައިވާކަމެވެ. މިކަމުގެ ސަބަބުން ކުރިއަށް އޮތްތަނުގައި ކޮރަޕްޝަންގެ މައްސަލަތަކުގެ ތަޙުޤީޤުތައް އަވަސްވެ، ޝަރީޢަތަށް ގެންދެވޭ މިންވަރު އިތުރުވާނެކަމަށް އުއްމީދުކުރެވެއެވެ.
Advertisement
This content is created and paid for by advertisers and does not involve Voice Journalists
